Voter’s Day pual rally nei dawn

Kumin National Voter’s Day pualin Minstry of Youth Affairs-in ram pumah rally huaihawt tura a tih angin, he ministru hnuaia thalaite tana hma la thintu Mera Yuva Bharat Mizoram chuan vawiin – January 30 hian Govt T Romana College leh Sports Authority of India Aizawl nen tanghoin Aizawlah rally an huaihawt dawn.
Nehru Yuva Kendra Sangathan tih thin, tuna Mera Yuva Bharat (MY Bharat) tia thlak taka Mizoram State director Mercy Selate chuan, National Voter’s Day hi January 25 a ni a, kuminah Pathiannia a tlak avangin ministry lam an ngen angin January 25 hnu lam, January 30 ral hmaa rally hi buatsaih phalna an pek angin an inruahman ta tih a sawi.
He programme hi vote nei tharten ram hmasawnna ngaihtuah a, hruaitu tha, ram tana thawk tha tur thlan chhuah chu an mawhphurhna a ni tih thalaiten an hriat a, ram hmasawnna ni turin thalai hrisel tha neih a tul zia aupuina a ni tel dawn tih a sawi a ni.
MY Bharat hi Mizoramah thalai 8000 vel an nei tawh a, MY Bharat portal-ah a inziahluh theih zel tih State director hian a sawi a. T Romana College atanga neih tur rally-ah hian thalai vote nei tharte tel turin an sawm tih a sawi.