VUC hmaah eiru lo turin kan intiam – Lalduhoma

Pathian leh Val Upa Council hmaah eiru lo turin ZPM candidate-te an intiam vek tih an party leader Lalduhoma chuan a sawi.
Thawhlehnia Sialsuka ZPM Aizawl South III Joint Block Conference a hmanpuinaah Lalduhoma chuan ZPM-in hmasawnna a aupui rualin, ram rorelnaa Pathian ram a thlen an duh a, Pathian ram thlen nana daltu lian ber chu hlemhletna a ni tih a sawi. “Hei hian kan rilru sukthlek a tidanglam nasa a, mipui pawhin ram roreltute rin mai harsa an ti tawh. Hemi siamtha tur hian ram hruaitu tha, ‘ka eiru loang’ tia intiam ngam Pathian hnenah kan dil a, a chhanna kan hmu ta in kan hria. ZPM candidate-te hian Pathian leh Val Upa Council hmaah ka eiru loang tiin kan intiam vek a ni,” a ti.
A taka tihhlawhtlin theih chauh policy an siam a, tihhlawhtlin theih loh tur an sawi ve ngai lo tih ZPM leader hian sawiin, “Sem hmanga ram siam kan tum ve loa, thawhrimna hmangin ram tundin kan tum. Thalaite zingah politics-a harhtharna a thleng nasa a, ram rorelna tha duhin an tuihal a, nu leh paten hmalam hun an thlirin beiseina lian tak ZPM-ah an nei a ni,” a ti.
ZPM chu a chhung amite pawh mi chi hrang hrang awmkhawm, a then chu political party thenkhata hnuhma lo nei tawh, thenkhat NGO lama hnuhma ngah tak, political background nei miah lo, a then sawrkar hnathawk pension, a then sumdawng leh kuthnathawktu thlengin an awm a, an chikimin an famkim bik lo tih an pawm thlap tih ZPM hruaitu hian a sawi. “Heng zawng hi beiseina thar nei kalkhawm kan ni,” a ti.
Nilainia ZPM Gen. Hqrs. a Tawngtai Committee buatsaihin Serchhipa tawngtai retreat neihah Lalduhoma hian, ram hruaituten central-ah sum zuk sawichhuak thin mah se, anmahni bawkin an eiru leh thin a, an hnuaia thawk party worker thenkhatten an pute eiruk an la sawi mam sak lehzelte chu thil mak a ni, tiin, ZPM candidate-ten ‘ka eiru loang’ an tih chu mipui pawhin rinna an nghat a, hei an lo sawrkar a nih chuan an tithlawn dawn loa, an eiru dawn lo tih a sawi a ni.