VUC-in MLA ho leh OB kokhawm Mipui sawrkar din turin hrilh nawn

ZPM Val Upa Council chuan Nilaini khan ZPM Legislature Party member-te leh ZPM Gen. Hqrs elected office bearers te thutkhawm puiin, sawrkar kal zel dan tur leh inrelbawl dana hmasawnna tur a sawipui.

Val Upa Council (VUC) chairman Lal Fakzuala chuan, sawrkarin ram a kaihhruai dan ngun takin an lo thlir a, sawrkar hmasaten ram an kaihhruai danah duh khawp loh lai an neih leh an lo sawisel thinte chingfel tura tun sawrkara an beisei dan sawiho a ni chu lawmawm an ti tih a sawi.
Party sawrkar ni loin, mipui sawrkar dik tak din tura beisei an ni a, chumi lam hawia kal zel tur chuan VUC chuan a beisei reng che tih a hrilh. Sawrkar inrelbawlnaah direct takin inrawlh thei lo mah se, thurawn pe tur chuan thuk takin an inrawlh zel dawn a, party leh sawrkarin tih dik loh a neih pawha khalhngil tur leh thurawn pe zel turin theihtawp chhuahin an kaiza an veng dawn tih a hrilh bawk.
“Sawrkar hmasa tih angte tih ve zel a rem dawn loa, an tih ngam loh thiltha erawh huaisen taka kan tih a tul fo ang. Dawih tak leh hlauh nei lutuka ram hruai hi hmasawn lohna pakhat a ni a, midang ngaichang loa thu duh lutuk pawh thil tha a ni chuang lo. Kawng engkimah Pathian dah hmaksak zel a finthlak a, sawrkar hma aiin a letin tawngtai tam a tul ang. Bible leh Pathian rawn hnem lehzual turin ka duh che u a ni,” Lal Fakzuala hian a ti.
ZPM Legislature Party leader, chief minister Lalduhoma chuan ZPM chu hun harsa tak paltlangin an inhrualmum a, an party kal chhoh danah pawh tawrhchhel a ngai thin hle tih a sawi. Pathianin a hun takah hna a thawk a, mi tamtakin sawrkarna pawh siam thei loa tiltiak leh mai tura an ngaih laiin, party chhungkua inhmangaih tawn tak an lo ni a, an taimak leh induhsak tawn rah an seng a, mipui khawngaihna zarah sawrkarna an siam tih a sawi a ni.
“VUC-in fim takin ro a rel a, min uap tlat a, kan tlan chak lutuk tur min veng a, kan kalmuang lutuk tur min nawr a, kan bana min kaih tlat avangin ZPM party tan chuan an hlu hle. Kan rorel dan leh thu kan tih tluknaah zaah za in kan tifuh vek seng kher lo maithei, tih sual palh pawh kan nei ve ngei ang, chu’ngah chuan kan mamawh tur chu VUC hi in ni. Zilhhau kan ngaih hunah rang takin rawn che ula, in thurawn hi engtiklai pawhin kan mamawh reng a ni,” a ti.
ZPM Gen. Hqrs president Lalliansawta pawhin Pathian leh mipui zarah an kuatah rorelna a lo tla a, an chungah mipuiin rinna an nghat a, mipui an tibeidawng ve thiang lo tih a sawi.
“Party ve ta fam chu, lehlam pawlten min rawn bei ve ta malh malh a; keini erawh chuan dawhthei takin kan thil tih hmangin kan chhang zel dawn. Chumi tur chuan kan hnathawh ram leh hnam rotling a ni tur a ni. ZPM chuan eiru lo turin kan intiam a, kan eiru lo mai ni loin kan hmuh phakah eirukna a awm lohna turin Pathian hrereng chunga kan kal a ngai. Mipui hmaa kan intiamna hi Pathian hmaa kan intiamna a ni tih hrereng ila, Pathian tihna nen ro rel zel turin kan insawm nawn a ni,” a ti.