Vur ram sakei 718 India-ah awm mek

India rama vur ram sakei (snow leopard) chhiarpui neih hmasak berah 718 a awm niin union environment ministry chuan a sawi.
India hian khawvel puma vur ram sakei la awm zawng zawng zinga 10-15% a kawl mek tihna a ni a, International Union for Conservation of Nature chuan vur ram sakei hi mang hlauhawm zinga a dah a ni.
An chenna hmun a bo zel avang leh hmasawnna ruhrel din nana pelh an nih thin avangin an tlem chak hle a, Chhiarpui hi kum 2019 leh 2023 inkar khan Snow Leopard Assessment in India (SPAI) Programme hnuaiah neih a ni.
Khawvel puma vur ram sakei awm zat hriat tumna, Population Assessment of the World’s Snow Leopard (Paws) kalpui mek hnuaia chhiarpui hi neih niin, India-a chhiarpui neih hi an chenna, Himalaya tlangdung vur ram, sq km 1,20,000 huam chhunga kalpui a ni.
“Tun hnai mai thleng khan India-a vur ram sakei awm zat hi mumal taka chhiar a nih thin loh avangin a zat hi hriat a ni ngai lo,” tiin union ministry chuan a tar lang.
Chhiarpui hi ram chhunga an chen theihna nia ngaih 70% velah kalpui a ni a. Hmar lamah Ladakh, Jammu & Kashmir, Himachal Pradesh leh Uttarakhand leh hmarchhakah Sikkim leh Arunachal Pradesh-ah te neih niin, thlalakna kamin 214 thla a lak fuh bakah mi thiamten an hnu chhuia an awm ngei tih an chhal ngamte nen 718 hi an chhiar tling thei.
Ramsa vâng tawh tak awm zat hriat hi Himalaya huam chhunga thil nung awmte inrintawn dan hriat nan a pawimawh tel a, an ei thin sa dangte pun leh tlem theih dan hriat nan pawh a tul. Vur ram sakeite chen mekna hmunte hi venhim loh an ni hlawm a, ngaihven that a ngai niin ministry chuan a sawi a. “Hun rei zawka an dam khaw chhuah theih nan ngaihven an ngai hle,” a ti bawk.