Vur vangin Switzerland leh France-a Apls resort tlawh theih loh

Vur vangin Switzerland leh France-a Apls resort tlawh theih loh
Alps-ah vur nasa taka a tlak avangin Swiss ski resort Zermatt chu tlawhpawh theih lo a ni mek a, French resort Tignes-ah pawh khualzin leh mi chengte chu pawn chhuak lo tura tih an ni bawk.
Tignes Mayor Serge Revial chuan an khuaah metre chuang vur a tlak hnuah a tawlh a awm a hlauhawm hle tih sawiin, ‘mipuite him nan thutlukna kan siam’ tiin a sawi.
April thlaa Alps-a vur tla hi thil thar a ni lo va, Franch khawchha lama Savoie region-a chhungkaw sang telin power an nei lo mek.
An thenawm, Switzerland-a Italy luhna, Simplon Pass leh Great St Bernard Tunnel chu khar a ni a, canton pahnih phei chuan an tuar na hle.
Khualzinten vur tawlh tura an pan thin, Valais leh Bernese Oberland khuate chu tlawhpawh hleihtheih an ni lo.
Valais chhim lama Zermatt hi lirthei leh rel hmanga tlawhpawh theih an ni lo va, Ningani nileng khan power nei tawh lovin mobile phone network pawh a chhe hle.
Khaw chhunga supermarket inhawng awm chhunah mi an intlar nasa hle niin Swiss chanchinbute chuan an tar lang.
Alertswiss app chuan vur tawlh a hlauhawm thu leh Valais-a thing tlu nasa an tar lang a, hei hian inkalpawh a tiharsa niin an tar lang a. Sion-ah chuan sikul khar a ni bawk.
Easter hman tuma heng lai vel zin turte chu Inrinni thleng zin rih lo turin an ti a. Police chuan a theih hram chuan pawn chhuak lo turin an ngen.
Zermatt chhim lam, Italy hmarthlanga Aosta Valley-ah chuan municipality 74 zinga 37 chuan power an nei lo va, Piedmont bula Biella-ah lei a chim bawk.
Italy hmarthlang lama buaina lian ber chu ruah sur nasa lutuk a ni a, luite luang liamin putar kum 92 mi chu Turin bula Monteu da Po khuaa a ina a awm tui lianin a la.
River Po bula khuaah khawlaiah pawh tui a tling khat vek a. Phai kuamah inralrinna sang ber tichhuakin darkar 24 awm leh tur chhungin tui chim chin san lai ber a thleng dawn niin an sawi.
Khawchin zirtute chuan darkar 36 chhungin ruah cm 20 chuang a sur dawn nia sawi lawkin a sur nasa lai phei chuan a tam dawn hle tih an sawi.