Russian news video-in Serbian ‘volunteer’ te Ukraine a Russian sipaite pui tura an training lai video a tihchhuah chuan Serbia-ah thinrimna nasa tak a thlen a. Moscow leh Serbia inlaichinna hi buai hnawk tak a ni.
-- Advertisement --
Video hi Russia Wagner mercenary te siam niin Serbian tawng hmangin Ukraine indonaa inhnamhnawih ve tura an ngenna a ni a.
Serbia president Aleksandar Vucic chu he video avang hian a thinrim hle a. “Nangni Wagner te hian eng vangin nge kan dan kalh a ni tih hre chunga Serbia mi te in ngen ngawt?” tiin a sawi a. Serbian te hi ram dang indonaah an inhnamhnawih an danin a phal lo a ni.
Sawiseltute chuan Serbia hi hun rei tak Russia nena inlaichinna tha neiah an puh thung a. Mahse, tun hnaiah erawh thil awm dan a danglam ta viau nia ngaih a ni thung.
President Vucic chuan Serbia chu Ukraine indona thleng mekah ‘neutral’ a ni mai ni lovin ‘thla tam tak’ chhung Russian President Vladimir Putin nen an in be tawh lo tiin a sawi.
Serbian mi sipaia lakte hi an tam lem lo nia ngaih a ni a, a then te chu kum 2014 daih tawha Ukraine-a Russian forces te lo pui tawh an ni a. Serbian court chuan ‘ram dang indona a tel’ tiin chung mi thenkhatte chu a lo hrem tawh bawk.
Belgrade-based lawyer leh anti-war group te chuan Russian ambassador mai bakah Serbia state security and information agency (BIA) hotu lute chu Wagner group a tel tura Serbians te laah puhin court-ah thubuai an theh lut nghal bawk.
Serbia a political party tin te chu Russia-in Ukraine-a run thlawp thu sawi an awm lo va, chu mai ni lovin United Nations-ah pawh Serbia chuan Russia huangtauna kalh zawng hlirin vote a thlak bawk.
President Vucic chuan chiang takin Belgrade tanna sawiin, “Kei ni chuan Crimea hi Ukraine a ni a, Donbas hi Ukraine a ni a, a ni zel ang kan ti a ni,” tiin a sawi.
Mahse, he an dinna a sawi hian European Parliament chu a hneh vak lo, a chhan chu Serbia hian Russia laka hrekna kalpui duh lo zawngin vote a thlak leh tho thin thung a ni. MEPs te chuan resolution siamin Serbia-in Russia hrek a duh loh chhung chuan EU member nih a tumna chu kalpui chhunzawm loh ni se an ti bawk.
Chutih rualin EU-in an block chu Western Balkans lama zarpharh an tum loh chuan Serbia tan chuan Moscow nena inzawmna tha neih chu tihmakmawh tluk a ni bawk si a ni.
Belgrade hian man tlawm takin Russia atangin gas supply a hmu bawk a, Russia company Gazprom chu Serbia oil company NIS a share nei lian ber a ni bawk a, hei mai bakah Russia chuan Kosovo independence a pawmpui duh lo te chu Moscow nena inzawmna tha an neih ngei ngaihna a ni ve tho a ni.
Chutih laiin EU chuan Western Balkans lama inzarpharh loh chuan Moscow huhang a ti na zel tih an manfiah tawh bawk a. Hei vang hian Albania leh North Macedonia tena EU member nih an tumna an dan thin pawh an phelh tawh a, Bosnia phei chuan candidate status a nei tawh hial a ni.
Serbia president pawh hun remchang a zawn chu a hma ta nia ngaihna pawh a awm a. Vucic hian policy thlak lam hawia kal a duh ngai lo viau a, mahse, tunah erawh Khawthlang ram te a hawi ta nia ngaih a ni thung a. “EU kawng hi kan zawh mai tur chu a ni, kawng dang a awm lo,” tiin Serbian president Vucic chuan Bloomberg hnenah a sawi.