Walker Out, Marmoush In

English Premier League champion Manchester City chu tha zawka inlan tumin an insing sa mek a. AC Milan lamah Kyle Walker an tirhchhuah rualin Egypt forward Omar Marmoush chu Eintracht Frankfurt atangin an la lut ve thung.
Italian club lian AC Milan in lak tuma an hel reng thin England defender Kyle Walker chu an la lut thei dawn ta a, Manchester City nen inremna an nei fel thei tawh. Milan hian Walker hi tun season chhung loan in an hawh hmasa zet ang a. A ngheta an la duh a nih chuan 5m euros (£4.2m) sengin an la lut zui leh thei dawn.
Manchester City tan inelna hrang hranga vawi 316 zet inlan tling tawh Walker hian January ni 4 khan West Ham United a hmachhawn a. Hemi hnu hian an manager Pep Guardiola hnenah eng tiang chiaha theihna sang nei nge a nih tih fiah turin ram danga inkhel a duh thu a hrilh. Chhuah a hreh lo tih a tlangthan hnuin Saudi Pro League club in an ngaihven nghal a var. Sum tam zawk hlawh theihna tur ni bawk ni mah se Saudi Pro-League club hnarin Italian club lian AC Milan a thlang ta zawk.
AC Milan player thar ni mai tu Kyle Walker hian kum 2017 khan Tottenham atangin City a zawm a, EPL-ah vawi ruk an champion tawh. Kum 2023 khan City joint Captain a ni. City player pawimawh a nih rualin England player pawimawh a ni tel bawk a. Three Lions tan hian inelna hrang hrangah vawi 93 zet a khel tawh.
Milan lamah Walker a kal lai hian City in player thar an nei zui nghal a, Bundesliga season kal meka khel tha tak Egypt forward Omar Marmoush an la lut zui ve leh nghal
City hian Omar Marmoush manah 70m euros (£59m) an seng a, kum 2029 thleng daih contract an ziahpui a. A contract pawh sei theihna an ziak tel bawk. Kum 25 mi Marmoush hian Eygpt tan vawi 35 khelin goal ruk a thun tawh a. Eintracht Frankfurt tan season kal mekah vawi 17 khelin goal 15 zet a thun a. Bundesliga season kal mekah amah aia goal thun tam awmchhun chu goal 16 thun tling tawh Harry Kane chiah a ni.
City a Jersey no 7 ha tur Marmoush hian Egyptian Premier League club Wadi Degla atangin bul a tan a, kum 202 khan VfL Wolfsburg a zawm. Kum 2023 khan club lian zawk Eintracht Frankfurt a zawm zui leh a. Frankfurt tan hian inelna hrang hrangah vawi 67 khelin goal 37 a thun a, assist vawi 20 zet nei bawkin a vul ta hle. A khelh that chhoh tak em vangin club lian hrang hrangin lak tumin an hel hlawm a, EPL champion City in an la lut ta a ni.
Marmoush chuan a club thar City chu kum 10 chhung zet chu khawvela club lian ber zinga ami a nih thu a sawi a. Season liam ta chhung chu an khel ropui leh zual a. City a zawm theih mai chu atan chawimawina tling a nih thu a sawi tel bawk.