Wang leh Modi inkawm dawn

Wang leh Modi inkawm dawn
Chinese Foreign Minister Wang Yi chuan India a tlawh mek a, Thawhlehni hian Prime Minister Narendra Modi-a nen an inkawm dawn niin external affairs ministry-in a sawi.
Modi-a’n Shanghai Cooperation Organisation (SCO) Summit-a tel tura China a pan hma chawlhkar hnih pawh tling lovah an inbe dawn a ni.
China a zin tur hi April-May, 2020-a Line of Actual Control (LAC)-a ram pahnih sipaite an intihbuai hnua a zin hmasak berna a ni dawn a. President Xi Jinping-a nena inbiak ngei pawh rin a ni a, nikum October thlaa LAC-a an buaina an tihfel hnua an vawi hnih inbiakna a ni ang.
Thawhtanni chawhnua New Delhi a thlen hnuah Wang-a hian External Affairs Minister S Jaishankar-a nen an inkawm nghal ang a. Thawhlehni tukah National Security Adviser Ajit Doval-a nen ramri chungchang sawina, 24th Special Representatives Meeting atan an inkawm bawk ang.
Tla lamah Modi-a hi a chenna inah kawmin Nilaini zingah India a chhuahsan ang.
Wang-a hi Pakistani Foreign Minister Ishaq Dar leh Taliban Foreign Minister Amir Khan Muttaqi te nen Kabul-a an inbiak hnuah New Delhi a pan dawn nia sawi a ni a. An pathuma inbiak hi thla hmasaa Islamabad-a neih tura ruahman tawh kha niin Muttaqi-a hi UN Security Council-in a hrek avangin Pakistan-ah a zin thei lo a ni.
Wang-a hi Islamabad-ah pawh a zin mai thei nia sawia ni bawk.
Wang-a’n India a tlawh chhan ber hi LAC leh ramri hmun danga New Delhi leh Beijing inkara inrem lohna awm ching fel tura Special Representatives indawrna atan a ni a. Modi-a August 31 leh September 1 inkara SCO Summit hmanga an ram a tlawh tur inthawh lawkna a ni bawk.
Special Representative pahnihten ramria muanna a awm theihna tur bakah sumdawnnaa inpawh lehna tur an sawi thin a. An inbiak hnuhnung ber chu December kha niin Doval leh Wang hian ‘hma lam panin kal zel a ni’ tih an sawi ve ve.
India leh China hi tun hnaiah inhnaih leh hret hretin thlawhna pawh an inthlawhpawhtir leh tan dawn a, ramriah sumdawnna pawh hmun thenkhatah an kalpui leh tan a. China-in India-a fertiliser a thawn chhuah pawh chhunzawm leh tum hnaih a ni bawk.
Tun hnaiah India leh China hian Tiber huam chhunga Kailash Mansarovar Yatra chhunzawm leh an phal a, New Delhi pawhin Chinese-te tan tourist visa a pek chhuah chhunzawm ve bawk.
Wang-a’n India a tlawh tur hi President Donald Trump-a’n Delhi-in Russian tuialhthei a lei avanga tariff 25%-a a tihsan tur nen 50% laksak a tum avanga India-US inkar a that loh mek lai a ni.
Thla hnih liam ta chhung khan Defence Minister Rajnath Singh leh Jaishankar hian China-a an chanvo ang chang ve ve an lo kawm tawh bawk.