Warehouse hman tangkai dan dap

Sairang leh Lengpuia Horticulture department warehouse hrang hrang chu Nilaini khan Horticulture minister Prof. Lalnilawma’n a tlawh.
Horticulture chu ram ei leh bar intodelh nana department pawimawh tak a ni tih Prof Lalnilawma hian sawiin, ZPM policy tam zawk pawh Horticulture department kutah a awm tih a sawi.
Sawrkarin hmun hrang hranga warehouse leh kudam engemawzat a neihte tangkai zawka hman dan an ngaihtuah chho zel a, department dang nen tanghoin thlai thar chhekkhawl nan pawh hman dan an ngaihtuah dawn tih a sawi bawk.
“Kan rama thing leh mau chhawr tangkai dan tur kan ngaihtuah a, kan rama mau hi quality tha tak tak a ni. Mau hmang hian thil tam tak a siam chhuah theih a, meihawl mai bakah furniture tha tak tak, ram pawna thawn chhuah theih khawpa tha a siam theih a, thalai hna zawng mekte leh heti lama talent nei tha tak takte tan kawl a eng zel dawn a ni,” Horticulture minister hian a ti.
Adviser to chief minister Dr KC Lalmalsawmzauva pawhin ei leh bara intodelh theih nan Mizoram sawrkar chuan theihtawp a chhuah a, thlai thar lei tur thlang chhuakin chumi tihlawhtling tur chuan theihtawp chhuah a ni tih a sawi.
“Mipuiah beiseina dik lo siam kan tum ve loa, kan tih theih ngei tur erawh chiang takin kan sawi a, hma pawh kan la mek a ni,” a ti. Kuthnathawktuten an thawhrim rah an seng ngei an duh a, mipuiin an lakah beiseina sang tak neiin ZPM an thlang tling a, mipu tih beidawn hi ZPM chuan an tum lo tih a sawi a ni.