Warriors an chak

Nilai zinga NBA regular season khelhah Golden State Warriors chuan Philadelphia 76ers an hneh a. Inkhel dangah Los Angeles Lakers an tlawm ve thung.
NBA-ah vawi sarih champion tawh Golden State Warriors hian Philadelphia 76ers lakah bul an tan tha lova, quarter khatnaah point ngain hnufual zawkah an tang nghal. Bul tan tha lo mah se quarter hnihna atangin an insiamtha a, quar dang pathumah chungngun zawk an ni ta vek. Quarter hnihnaah point sarihin an chungnung a, point hniha hmahruai chungin chawlhlawk an hmang.
Chawlhlawk hnu lamah pawh Warriors an khel tha chhunzawm. Quarter thumnaah point 7-a an chungnung hnuin quarter hnuhnung berah point thumin an chungnung zui leh a, point hnehna an chang a, point 119-107 in an chak zui ta a ni.
Season kal mekah vawi 20 chak tawh a, vawi 24 zet tlawm tawh Golden State Warriors tan hian Stephen Curry chuan point 37 a thawkchhuak a, a chetha hle. Curry hian game an khelh hnuhnung vawi rukah a zawnin point 25 chin chung lam a thawkchhuak zawn vek. An hneh tak Philadelphia 76 ers pawh tunhnaiah an khel tha lo va, an khelh hnuhnung vawi li-ah an tlawm vek.
Nilaini zinga inkhel dangah Anthony Davis tel lova inlan Los Angeles Lakers chu Atlanta Hawks lakah point 138-122 in an tlawm a, Lakers hi ni hnih chhunga an vawi hnih tlawmna a ni nghe nghe. Inkhel dangah point 20 zeta hmahruai hman Boston Celtics in Indiana Pacers lakah an hmahruaina an hum zo lova, point 129-124 in tlawm zawkah an tang ringawt.
LA Lakers leh Celtics te an tlawm lai hian New York Knicks chu a zawna a vawi riat nan an chak ve thung a. Madison Square Garden-a an khingpui Utah Jazz chu point 118-103 in an hneh.