Washington-ah Trump-a leh Netanyahu inbe leh dawn

Washington-ah Trump-a leh Netanyahu inbe leh dawn
Israeli Prime Minister Benjamin Netanyahu-a chu Washington, DC-ah zinin US President Donald Trump en tariff leh Iran telin thil chi hrang hrang an sawi dun dawn niin Netanyahu-a pisain a puang.
An sawi dun tur zingah hian Turkiye-Israel inkungkaihna, Iranian hlauhawm theih dan, Israel-in Gaza a beih mekna, tariff leh International Criminal Court (ICC) beih leh dan tur pawh a tel niin Israeli prime minister pisa chuan Inrinni khan a puang.
US chanchinbute chuan US leh Israeli thuneitute chu indawrin White House-a Thawhtanni (India-ah chuan zan rei lam)-a an inbiakna tur an duang a ni.
Trump-a hian Ningani khan phone-in a lo be tawh a, hemi tum hian Netanyahu-a chuan tariff pawh a lo sawipui a. Tun hnaia Trump-a’n ‘reciprocal tariffs’ tia ram dang atanga thil an lak luhte chhiah a tihpunah Israel pawh hi 17%-in a tihsansak ve a ni.
Israel hian tun hnai khan US atanga thil lak luha chhiah an lak thin la awmte chu a titawp vek a. Ram pahnih hian kum 40 liam tawhah khan free trade agreement siamin Israel-a US bungraw lut 98% chu chhiah chawi lova lut sa a ni.
Netanyahu-a hi kum 2023 khan ICC chuan Gaza-a indonaa dan bawhchhiaa puhin manna thupek a tichhuak a, hemi hnua a vawi khat nan Europe tlawhin Hungary-ah a zin.
Hungary-a sorkar chuan a tlawh hma lawk hian ICC atanga an inhnuhdawk thu Prime Minister Viktor Orban-a’n a sawi a. US chu he court-ah hian member a ni lo sa thung.
An inbiakna turah hian Gaza-a inkahhai inremna thar a awm theih dan tur leh Palestinian pawlin Israeli an hrente chhuah theih dan tur pawh a tel dawn a. Israel hian hun eng emaw chen inkahhai a awm hnuah thla hmasa atang khan Gaza-a Palestinian hel pawl, Hamas a bei thar mek.
Trump-a hian Iran chu nuclear programme chungchanga inremna nei thar turin a nawr mek bawk a. Tehran hian mi dang kaltlanga inbiak ni se a duh thung.
US hovin khawthlang ramte chuan Tehran hi nuclear ralthuam neih tuma hma laah a puh reng a. Iran erawh chuan he puhna hi phain nuclear a sawngbawlte chu vantlang tan veka a hman thu a sawi thung.