Wayanad leimin vanga chhanchhuahna kalpui mek zel a ni

Kerala Wayanad a leimin turu takin a tihchhiat dan chiah hriatfiah theih a la ni lo va, rescue team te chuan leimin hmasakna ber pawh an la pawh thei lo tiin Governor Arif Mohammed Khan chuan a sawi a, nunna chan 200 chuang an awm tawh a ni.
Governor chuan nunna chan tam ber te hi leiminin a chhilh avanga Chaliyar river-in a luanna kuang a sawnin khua a hnawl zui vang a ni ber a ti a.
“Leiminin lui a hnawh pin avangin luiin a luanna kuang a sawn chuan khua a hnawl ta a ni. Leiminin a hnawl hmasakna ber khua pawh kan la pawh thei lo” tiin a sawi.
He khua hi a panna lei chu tuilianin a lak avangin tlawh pawh theihin a la awm lo a ti bawk a. “Army engineering unit ten bailey bridge an dawh mek a, darkar reilote hnuah dawhkai theih beisei a ni,” tiin Governor chuan a sawi bawk a. Lei dawhkai a nih phawt hma chuan leiminin a tihchhiat dan kimchang kan hre thei dawn lo a ti bawk a. “Leimin tanna kan la pawh theih tlat loh avangin tunah chuan engmah a nghawng dan kimchang kan la hre thei lo,” tiin a sawi.
Governor chuan leiminin a chhilh hmasakna ber khua chu hmun kilkhawra awm a ni lo a ti a. “Tlangram a ni a, mahse, kilkhawr a ni lo, town area huam chhunga awm a ni a, kum 100 chuanga upa a ni tawh,” tiin a sawi bawk.
Union Home Minister Amit Shah-an leimin hma niin Centre chuan Kerala hnenah leimin awm thei tih an hrilh lawk a tih chungchangah Governor chuan, “Nimin kha chutiang lam ngaihtuahna hun a ni lo va, he issue hi la ngaihven theih a ni lo. Tun hi mipuite lungngaihna tawrhpui hun, damlote leh an chhungte hnem hun a ni,” tiin a chhang a ni.
Amit Shah thusawi chuan political blame game siam nghalin Kerala Chief Minister Pinarayi Vijayan chuan Amit Shah thusawi chu hnawlin chhiatna thlen hnuah Centre warning an dawng chauh a ti ve thung.
Chief Minister Pinarayi Vijayan chuan sorkar chuan chhungkua leiminin a hnawla dam chhuak ten privacy an neih theih nan relief camp unit hran an siam dawn tiin a sawi a.
“District administration ten visitor te chhinchhiahna tur reception desk an siam ang a. Meeting leh interview neihna tur common area siam a ni ang a, relief camp chungah camera lakluh phal a ni lo,” tiin a sawi bawk a.
Congress leader leh Wayanad MP hlui Rahul Gandhi leh a farnu Priyanka Gandhi Vadra te chuan leiminna hmun Chooralmala an tlawh nghal bawk a. Ruahsur karah Gandhi te hian Meppadi a Community Health Centre tlawhin chumi hnuah Dr. Moopen’s Medical College leh Meppadi a relief camp pahnih an tlawh zui nghal a ni.
Central sorkar hnuaia scientific research institute te chuan tun hnai nihnih chhungin eitur shelf life nei rei zawk te Wayanad-a leimin tuar damchhuakte tan an ruahman mek bawk a.
Council of Scientific and Industrial Research (CSIR) – National Institute for Interdisciplinary Science and Technology (NIIST) Thiruvananthapuram te chuan technological transfer incubation cell te chu food processing leh production unit-ah letin mi 70 vel research scholar, volunteer te nen food item 1,000 packet siamin hma an la mek bawk a. Scientists-te chuan Food item shelf life nei rei Upma ang te protein value nei sang em em si te siamin hma an la mek tiin sawi a ni.