Dubai-ah inhnek thei lo mah se LPS Pro Fight champion Laldinsanga’n tun thla tawpah WBC Youth World title a chuh dawn a, Michael Decardi Nelson nen an inhnek ang.
Grassroot Boxing hmalaknain November ni 30 khian White House, Bangalore-ah boxing show ropui tak huaihawt a ni dawn a, inhnek pui berah kum 21 mi Dinsanga leh Ghanaian fighter Michael innuaiin, Ramthar Lunglei boxer a chak a nih chuan Mizo zinga WBC Youth world champion ni thei pahnihna a ni dawn a ni.
Pro Fight bantamweight champion Dinsanga hian November ni 9 khan Dubai-ah inhnek tumin inbuatsaihna ngawrh takin a kalpui a, WBC Youth world title a chuh theihna tura inhnek pawimawh ni mah se hliam vangin a puitlin thei lo.
Chuti chungin hun tha a nei zui thei dawn a, professional huangah tum riat a inhnek tawhah chak vekin mi panga a knockout a, September ni 24 khan Bangalore-ah tawnhriat nei tawhin awlsam takin Mohamed Junaid a hneh a ni.
A hmaa ding tur kum 22 mi Michael hian professional huangah hnuhma tha tak nei ve mekin vawikua a inhnek tawhah tlawm nei loin tum riat a chak a, March ni 24 kha a inhnek hnuhnun ber niin Ghanaian khawpui Accra-ah Sodiq Adeleke a hneh.
Inhnek dangah Pro Fight middleweight champion C. Lalhruaitluanga’n WBC India title a chuh dawn bawk a, Ritesh Singh nen an inhmachhawn ang.
Kum 27 mi Hruaia hian pro boxing a luhchilh atangin vawisarih hnehna a chang zawn a, a inhnek hnuhnun vawihnihah Kazakhstan leh Abu Dhabi-ah fehchhuakin a tlawm ve ve thung.
WBC India champion Mizo boxer pahnih Vanlalawmpuia leh F. Zoramchhana pawh an inlan dawn a, Awpa’n Ugandan boxer Kagimu Ivan Kigga bitumin, Cherhlun tlangval Zotea leh Filipino fighter Norberto Tano an innuai ve thung ang.
WBC Youth World Title: November ni 30-ah Dinsanga vs Michael
Get real time updates directly on you device, subscribe now.
Next Post