Weightlifting bronze awrhtu: Cindy Lalparmawii

Weightlifting bronze awrhtu:
Cindy Lalparmawii
Vawiina zawh fel tur January ni 8-14, 2024 chhung awh Brahmapur, Odisha-a Asmita Khelo India Women National Weightlifting League Youth, Junior leh Senior-ah Mizo tleirawl Cindy Lalparmawii chuan 76 kg Youth huang atangin bronze medal a hlawhchhuak.
Lalparmawii hian nikum July thla khan Bhubaneswar-a Asmita Khelo India East Zone-ah Youth atanga silver medal awrhin, Junior category-ah bronze medal a la tel a; he mi tum zone hrang hranga lawmman late hi kumin Brahmapur, Odisha-a Asmita Khelo India National Women Youth, Junior leh Senior Championship-ah an inlan zui leh a, Kolasib Saidan lifter Cindy Lalparmawii hian 76 kg Youth-ah chauh bronze medal a sualchhuak thei ta a, East ZOne ang khan Junior huang lamah medal a la zo ta lo a ni.
76 kg Youth huanga gold awrhtu chu Vaishnavi (Haryana) niin, Odisha mi Prativa Rani kutah silver medal a lut thung.
Pari hi Rajiv Gandhi Stadium, Salem Veng, Mualpuia Khelo India State Centre of Excellence (KISCE) hostel awmin, coach Malsawma Khiangte (SYS) zirlaite zinga pakhat a ni.
Odisha-a fehchhuak Mizoram team hi Malsawma Khiangte (Bethlehem Veng) leh KISCE-a masseuse ni mek Malsawmtluangi (Republic Vengthlang)-te’n an hruai.
He thu buatsaih lai hian vawiin +81 kg huanga inelna hmachhawn Zosangzuali dinhmun tarlan hman a ni lo.
January ni 28 atanga February ni 14 chhung awh tur Uttarakhand-a 38th National Games of India 2025-a weightlifting inelna hmachhawn thei turin tun dinhmunah Mizoram atangin lifter pathum an tling (qualified) tawh a, chu’ng mite chu kg 67 huanga khel tur Silvan Beihrothatlo (ASI, Pune/Siaha) bakah kg 89 huanga chhuak tur Lalruatfela (NCOE, Patiala/Bungzung) leh kg 71 huanga tel tur Lalchhanhimi (SSB, Delhi/Khawzawl)-te an ni.