West Bank leh Jordan inkalpawhnaah Israeli pahnih kap hlum

West Bank leh Jordan inkalpawhnaah Israeli pahnih kap hlum
Israeli-te luah West Bank leh Jordan inkalpawhna bulah mi pahnih kah hlum an ni tih Israeli sipai leh Damdawi Inin an sawi.
Israeli chanchinbute chuan thite hi Israeli mipa ve ve an ni a. Magen David Adom (MDA) emergency service chuan kum 20 chuang leh kum 60 mi niin an sawi.
Israeli sipaite chuan ‘Jordan atanga puihna bungraw phurh truck-ah mi firfiak lo chuangin mi a kap ta a ni’ tih an sawi a. MDA chuan Allenby Crossing bula thleng niin an sawi ve bawk.
A hmunah hian venhim hna thawktuten a kaptu hi an kap hlum ve nghal tih sipaiten an sawi.
He thil thleng hi Palestinian hel pawl, Gaza-a Israel nena indo mek, Hamas chuan lawmawm an ti a, ‘nitin kan Palestinian unaute lakah Israeli luahtuten dan bawhchhiatna leh mi suatna an kalpui chhan letna’ tiin a sawi.
Kum khat liam taah khan he hmunah tho hian Israeli mipa pathum kah hlum an lo ni tawh a, Israeli sipaite chuan a titu hi Jordanian truck driver niin an sawi.
King Hussein Bridge tia an sawi bawk, Allenby Bridge crossing hi Amman leh Jerusalem inkar lai vel taka awm niin sorkar hriatpuia West Bank leh Jordan inkalpawhna awm chhun a ni a. Israel kaltlang lova West Bank luhna kawng awm chhun a ni bawk.
Jordan leh Israel hian himna, sumdawnna leh inpalai tawnna an kalpui reng a, hetih rual hian Jordan hi Palestinian-te laka Israel chet dan sawisel rengtu a ni bawk.
Jordan atang hian ni tin West Bank leh Israel bazara zawrh tur phur truck za tel an lut reng.
Palestinian news agency Wafa chuan Israeli thuneituten Ningania thil thleng vang an khar rih nghal tih a tar lang.