West Ham an chak zel
October 5, Ninga zan khan UEFA Europa League 2023-24 khelh chhunzawm a ni a, West Ham chuan Mimuala an hmachhawn SC Freiburg chu 2-1 in an hneh. Hammers hian English club zingah European Competion a tlawm nei lo zawn rei ber record thar an siam. West Ham rual hian Liverpool pawhin hnehna an chang ve bawk.
City khumtu West Ham
European Competion an khelh hnuhnung vawi ruka tlawm nei lo zawn tawh West Ham United chu SC Freiburg hmachhawn turin Park Stadion ah an leng lut. Mikhual an nihna mualah tlawm an pumpelh thei a nih chuan English record thar an siam thei dawn a. Mimualah 2-1 a hnehna changin, Manchester City record an khum a, record thar an siam ta hial a ni.
Hammers hian SC Freiburg lakah bul an tan tha viau a, inkhel tan atanga minute riatna lekah Lucas Paquetá chuan Jarrod Bowen siamsak atangin hmahruaina goal a thun. Hma taka goal an thun hian inrintawkna sang zawk a pe a, goal khat chhuah bawk mah se goal dang an thun belh leh.
Mualneitu Freiburg hian hma taka an si phurh sut tumin tan an khawh zui nghal chat a, chawlhlawk hmain an hlawhtling zo lo. Chawlhlawk hmain goal thun thei lo mah se, chawlhlawk hnu lamah goal an thun ta thuai thung. Second half tan atanga minute lina lekah Roland Sallai chuan goal thunin an si phurh a sut. Second half-ah goal an thun thuai vangin mualneitu team phur thar viau mah se goal an chhuah leh thuai thung. West Ham tan hian minute 66-naah Nayef Aguerd chuan Ward-Prowse siamsak atangin hma an hruai nawn lehna goal a thun a. He goal hi an chakpui zui ta a ni.
SC Freiburg lakah an chak leh tak vangin West Ham United hi European competition an hmachhawn hnuhnung vawi 17-ah tlawm an nei lo zawn ta chiah a, hei hi English record thar a ni. English club pathum; Manchester City, Leeds United leh Tottenham te khelh 16 chhung tlawm nei lovin an lo kal tluang tawh a, club pathumte record inkhum hi David Moyes enkawl West Ham hian an rawn khum ta a ni.
Group A-a point thum hmu ve ve inkhelah West Ham an chak vangin London club hian khelh hnih atanga point 6 hmuin hma an hruai a, an hnuai chiahah Freiburg hi an awm a. Olympiakos leh Backa Topola ten point khat ve ve an hmu mek.
Liverpool an chak
Season liam taah top 4 huang an luah phak loh vanga Europa League lama inlan ta Liverpool chuan Anfied ah Union St.-Gilloise an mikhual a, an mualah si hnih faia hnehna changin Group E-ah hma an hruai chhunzawm zel.
Liverpool hian an mikhual Belgian club Union St.-Gilloise lakah khel tha thawkhat viau mah se goal erawh an thun thei lawk lo. An forwawrd Darwin Nunez-a’n goal thun theihna hun tha tak a hlah a, a vanduai a kal tluang. Hun rei tak goal a luh theih loh hnuin chawlhlawk dawn hnaih minute 44-naa Ryan Gravenberch chuan hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah pawh goal a lut har leh viau. Hun pangngaiah Reds in goal an thun belh theih loh hnuin, hun pek belh minute 90+2-ah Diogo Jota chuan an goal hnihna thunin, an chakna a nem nghet a, si hnih faiin an chak zui ta a ni.
Group E-ah khelh hnih atanga point ruk hmuin Liverpool in hma an hruai a. Point li hmuin Toulouse in an dawt a. Point khat hmu tawh Union Saint-Gilloise in pathumna an luah a, LASK in point an la hmu ve lo thung.
Ninga zana inkhel dangah season liam taa finalist AS Roma chuan an mikhual Servette chu si li faiin an sawp a. Khelh hnih an chak zawn ta chiah. Khelh hnih chak zawn tawh mah se Group G ah pahnihna an ni thung. Roma tan hian Andrea Belotti-a’n goal hnih a thun a, Romelu Lukaku leh Lorenzo Pellegrini ten goal khat ve ve an thun bawk.
Group G-a hmahruaitu Slavia Prague chuan Fortuna Arena-a an mikhual Sheriff Tiraspol chu si ruk fain ngawtin an sawp. Slavia Prague tan hian Mojmír Chytil-a’n goal hnih a thun a. Igoh Ogbu , Munashe Garananga, Ivan Schranz leh David Doudera ten goal khat theuh an thun bawk. 6-0 ngawta an chak vangin an group-ah hma an hruai.