White House-ah UFC fight an nghat dawn!

White House-ah UFC fight an nghat dawn!
Nakkum July ni 4-a United States kum 250 tlin an lawmna tur peng pakhat atan kum tharah hian America president chenna in ropui White House-ah Ultimate Fighting Championship (UFC) event an nghat rup dawn!
He octagon cage fight event nghahna tur hmun hi kum 2000 bawr chhoa president Donald Trump-a’n a sumdawnna bungraw pakhat atana UFC event a huaihawt atanga inkawm tan tawh UFC boss Dana White chuan puangin, CBS Mornings hnenah, “He thil hi a thleng dawn chiang khawp mai,” a ti.
White chuan tun thla tawp lam hian president leh a fanu Ivanka-te a hmuh tur thu tarlang telin, tah chuan ruahmanna an siamte an final dawn niin a sawi.
An sawi anga a hlawhtling a nih chuan White House-in UFC fighting competition a thlen vawikhatna tur a ni ang.
An thu leh hla hmasa atang ringawt hi chuan khawi lai hmunah ber nge fight chu an huaihawt dawn tih a la hriat theih loh a; dan pangngai ang chuan UFC fight hian entu mipui sang tam tak a keng tel thin a, chu mi a nih avang chuan a khelhna hmun tur pawh chuti ang zat mipui lenna tur hmun thawl a ngai thin a, kil riat nei octogen cage chu mipuiin an hual thin.
White chuan Trump nena an sawidun dan boruak tarlangin, “Min lo kawh rual khan tihtur min hrilh a, Ivanka chu a lai taka ding tura a duh thu a sawi a; Ivanka pawhin min bia a, mipui hual vela cage dah theih dan turte kan sawiho a, khawi laiah nge tihte kan ngaihtuah a,” tiin mipui pawh a tawk fang chu he in ropui bik chhungah hian an pungkhawm thei dawn niin a lang, an sawi hmangah chuan!
Trump ngei pawhin thla hmasa khan Iowa lama thu a sawinaah White House-a UFC fight dawl chungchang hi a lo sawi ri zeuh tawh bawk.
A sawi danin, White House tualcharah ngei cage an siam ang a, mipui 25,000 tal chu an pungkhawm thei dawn niawmin a tarlang a, “4 July Salute to America event-a telh turin White House kawt laia UFC fight nghah kan tintuah a, he hmunah hian awl a zau tawk e,” a ti.