Wilder lakah Chisora a chak lo

Boxer thawmna, palian huanga boxer hriat hlawh ber zinga mi Derek Chisora chu Pathianni zinga a khingpui Deontay Wilder hneh lovin a tlawm. Chisora hi inhnek chawlhsan zui thei dinhmunah a ding.
Palian huangah boxer hriat hlawh leh an hun hnuhnung lam hmang chho mek Derek Chisora leh Deontay Wilder te hi London khawpuia O2 Arena-ah an inhmachhawn. Round tir lamah inhnehtawk thawkhat viau mah se round hnuhnung lamah erawh World champion hlui Wilder a chungnung ta viau thung a. Chisora hian knockout a tlawm a pumpelh hram a ni ber mai.
Palian hnek na zet mai Wilder hian round 8-naah a khingpui a hnek tlu a, knockout a chak ngei tumin nawr zui chiam thin mah se a hlawhtling zo bik lo. Chisora a inveng ve thei hram zel a, beilet ve hram hramin a tlu nawn duh tawh lova, mualpho lutuk lovin round 12 a ding tluan ta hram a ni.
Inhnek a zova, result puan niin endiktu pathum te point pek zat a inang lo vek. An point pek zat inang lo vek mah se Deontay Wilder an chaktir vek thung a, point 115–111, 115–113 leh 115–112 to Chisora in Wilder-a’n hnehna a chang.
London khawpuia an inhnek hi Derek Chisora leh Deontay Wilder ten professional huanga inhnek an hmachhawn vawi 50-na ve ve a ni a. Golden Jubilee bout hmanchhawnin hun chhiahtlak an tawng. Wilder lakah a tlawm vangin kum 42 mi Derek Chisora-a’n inhnek a chawlhsan zui mai rinna lian tak a awm a. Hetihlai hian Wilder erawh chu kawnghren chuh leh thei dinhmunah a ding ve thung a, an dinhmun a inang ta lo hle.