Wimbledon 2024 – Carlos Alcaraz-a’n quarter-final a

Wimbledon 2024 khelh mekah champion lai Carlos Alcaraz-a’n hma lam a pan zek a, Ugo Humbert lakah set khat hloh chungin a chak a, quarter-final a lut. Inkhel dangah Lorenzo Musetti chuan Giovanni Mpetshi Perricard lehthalin Grand Slam-ah a vawi khat nan quarter-final a lut ve bawk.
Champion lau Alcaraz hian fourth round a paltlang zo lo teuh hle a, zirtawp zan khan Frances Tiafoe lakah set hnih a hloh hman zet a, set hnuhnung pahnih la zawnin tlawm a pumpelh hram a, harsa taka hnehna changin last 16 a inhlangkai. Last 16-ah erawh tha zawkin a inlan a, Humbert lakah harsatna lian a tawk lo.
Grand Slam pathuma champion thei naupang ber Alcaraz hian Pathianni zana a khingpui Humbert lakah tha takin bul a tan a, set khatna tir lamah break a nei nghal. Break a neih a chhawr tangkai a, game thum chauh hloh chungin set a la. Set hnihnaah inhnehtawk zui viau mah se Alcaraz hian break pawimawh tak a nei zui leh a, set a la nawn leh. Set hnih hloh zawn hnuin set thumnaah Humbert a khel tha a, break a nei zawn a, game khat chiah hloh chungin set a la. Awlsam taka set thumna a lak vangin 16th seed Humbert hian beiseina thar nei bawk mahse set linaah a tlo zo lova, game pawimawh takah a serve a hum zawh loh vangin tlawm zawkah a tang. Alcaraz hian inkhel hmuhnawm takah 6-3 6-4 1-6 7-5 a hnehna changin quarter-final a lut.
Champion lai Alcaraz hian quarter-final-ah fiahna hautak zawk a hmachhawn zui dawn a, American 12th seed Tommy Paul a hmachhawn zui leh dawn. Alcaraz hmaa ding tur Queen’s Club champion Paul hian a khingpui Roberto Bautista Agut chu 6-2 7-6 (7-3) 6-2 a hnehin quarter-final a lut ve bawk.
Mipa lamah champion tura rinkai ten hma lam an pan zel a, Alcaraz a chak rual hian World No. 1 Jannik Sinner pawhin American 14th seed Ben Shelton chu awlsam tak; 6-2 6-4 7-6 (11-9) a hnehin quarter-final a inhlangkai ve bawk. Top seed Sinner hian a vawi khat nan Wimbledon-ah champion tumin tan a khawh zui dawn a, champion tura rinkai zinga mi Daniil Medvedev a hmachhawn zui leh ang. Russian fifth seed Medvedev hian Grigor Dimitrov a hmachhawn a, inkhel tir lamah a khingpuiin hliam a neih vangin hahdam takin hnehna a chang.
Jannik Sinner ang tho hian Italian Lorenzo Musetti pawhin harsa taka hnehna chang nawlhin major tournament-ah a vawi khat nan quarter-final a inhlangkai ve nawlh bawk.
Italian Musetti hian last 16-a a khingpui Mpetshi Perricard lakah bul a tan tha lova, rin loh takin set hloh hmasa zawkah a tang teh tlat. Set hloh hmasa zawka a tan hnuin a insiamtha thuai a, mit la takin a inlan zui nghal zat. Vanneihthlak taka Wimbledon hmachhawn ve thei hram lakah hian 4-6 6-3 6-3 6-2 in a chak zui ta a ni.