Wimbledon champion Krejcikova inhliam

Wimbledon champion Krejcikova inhliam
Devonshire Park-a grass-court grand slam tournament inbuatsaihna hnuhnung Eastbourne Open khelh mekah Wimbledon champion lai Barbora Krejcikova chuan quarter-final lut mah se malpui nain a tlakbuak a, France player Varvara Gracheva nen semi-final luh an inchuh hmain a inhnukdawk a, karleh Thawhlehni hi women’s champion title humhim tura a chetchhuah vawikhatna tur ni mah se Wimbledon-ah hian a inlan thei dawn nge dawn lo a hriat rih lo!
England ram chhim lam tuifinriat kama Wimbledon warm-up match kal mekah 2021 French Open trophy tela Grand Slam singles title pahnih la ve tawh Czech Barbora hian round one leh two lamah set thum ve ve khelhpui chungin Briton nula pahnih Harriet Dart leh Jodie Burrage-te a paltlang a; mahse, Wimbledon-a bul a tan hma ni li lek awm tawhah malpui hliam palzut mai mai remchang lo zetin a tlakbuak zui ta tlat a, a SW19 title kawl lai humhim tura champion a mamawh funa tournament chu mittui nen a hawisan a ngai leh ta rih a ni.
Kum 29 mi hian Nilaini khan a malpui na chu zan lamah pawh a reh lo tih sawi chungin, “Ka malpui dinglam na avanga inhnuhdawh hial ka ngai ta hi pawi ka ti a, chawlhhahdamna hun ka neih nual avang erawh chuan Wimbledon tan hunah hian ka ziaawm tawh mai ka ring a, eng thil nge lo thleng zel dawn kan thlir ang,” a ti.
Defending women’s champion a nihna anga Thawhlehnia Wimbledon bul tan tur Krejcikova hi a hma pawhin hnungzang na avangin hun rei fu a lo bawksawp tawh a, kumin hian match ruk chiah inelna a la hmachhawn a; chu pawh karliamta khan Queen’s lamah first-round match a paltlang zo lo a; tunah heti hi a ni leh ta a ni.
Nikum Wimbledon final-ah khan world number 17 Barbora Krejcikova hian Italy player Jasmine Paolini hnehin a tum hnihna atan major title a sualchhuak a, kumin hi chuan beisei a sang vak thei rih ta lo!