Wimbledon hmeichhe champion thar kan hmu dawn

Wimbledon hmeichhe champion thar kan hmu dawn
Nilaini zanah All England Lawn Tennis Club-a hmeichhe singles quarter-final khel zoin, nizan result tarlan hman lohah final lut tur an inchingfel zui a, tute pawhin final khel se kumin hian hmeichhe singles champion thar kan hmu dawn.
Final rematch-a dingchang Jabeur
Wimbledon Championships ni 10-na Nilaini zan women’s singles quarter-final pakhat zawkah Tunisian Ons Jabeur chuan nikum final-a a ngam loh third-seeded defending champion Kazakh Elena Rybakina lakah phuba lain 6-7(5) 6-4 6-1 hnehna nen last four a lut a, nizan final luh inchuh match pakhat zawkah second seed Aryna Sabalenka a hma-chhawn zui leh nghal.
Kum khat kalta khan Jabeur hian Arab hmeichhe zinga grand slam champion hmasaber nih theihna hun tha bawhpelhin Russian-a piang, sum lama tanpuina pe theitu Kazakhstan mi nihna nunpui zui ta Rybakina a paltlang zo ta lo a; Nilaini zanah erawh phuba lak duhna thinlung thuk tak nen set hmasa ber hloh zet chungin a tum a hlenchhuak a; champion lai a tlak tak avangin kumin hian Wim-bledon champion thar kan hmu dawn.
Quarter-final match a khelh hma zawng khan Kazakh Rybakina hian tun London tournament a khelh tawhah vawikhat chiah a serve a la hloh a, mahse, Jabeur laka ‘pressure’ chawl lo a hma-chhawn boruak zo loin a tumpui khan set khatnaah tum hnih ngawt a ‘break’ a, defending champion-in a title hum thei turin last four a lut zo ta lo.
Kum 24 mi Rybakina khan kumin Jauary thlaah Australian Open final lutin, third-round French Open match khelh dawnah damlohnain a tlakbuak a, inhnuhdawh hial a ngai a; SW19 in-buatsaihna lamah pawh virus avang bawka talbuaiin, Wimbledon inbuat-saihna Berlin Open last 16 pawh a paltlang zo lo leh a, chuti teh luk chu a nih avangin London grass-court grand slam lamah pawh Jabeur lakah a ‘serve’ pui tak thin kha a hloh then niin a lang a, a first serve 57% chiah tla dikin, inkhelh banah a ralthuam tha ber ni thin a first serve chuan hna a thawk tha lo tih a sawichhuak nghe nghe.
Rybakina hian Wimbledon-a a ni khatnaah title humhim tur a nih vangte a ni deuh bawk ang a, a nervous tih a hmuh theih a, mahse, round a sang zel a, inrintawkna a neilian zel a, chumi boruak chu sawiin, “Defending champion ni chunga inlan chu ka tan chona thar a ni a, a boruak pawh a dang deuh,” a ti.
Ons Jabeur lam hawi chhunzawm ila, Tunisian hian nikum final-a a chak loh kha na a tih em avangin Rybakina a hnehlohna match pumpui kha a ennawn leh ta miah lo tih sawi chungin a coach chu game plan thar duanchhuah kawnga tanpui turin a belbul ta zawk tih a sawi a, “Match pumpui ennawn leh chu rilru a na thar mai mai a, chuvangin point thenkhat chauh ka ennawn a, ka coach hnenah hrilhfiah ngai min hrilhfiah turin ka ti ta zawk a,” a ti!
Kum 28 mi chak lai thlirtu nine-time Wimbledon champion Martina Navra-tilova chuan Jabeur khan Rybakina thiltihtheihna a chawk zero tih sawiin, a bik takin serve-ah Tunisian a chungnung a, a khelhah pawh Rybakina khan engtia chet lak tur nge tih a hre lo tih a sawi a, Ons khan phuba lak a tumna kawnga a ruahmanna thar neihte a hmangtangkai niin a sawi ve bawk.
Jabeur hi nikum Wimbledon final-a a tlawm bakah nikum US Open final-ah Iga Swiatek a hneh lo bawk a, kuminah erawh player dang daih angin a inlan kal mek a nih hi.
Nizan semi-final match khelh hma khan a tum tur world number two Saba-lenka che rang lutukin a tihlunghnur thu sawichhuak chungin, “Player mak tak a ni a, Elena ang maia hlap na tak mai a nih avangin chona tling a ni dawn.
“Match harsa lutuk a ni dawn a, mahse, khelmualah ka rilru puthmang pangngai bawk hi ka thawhchhuahpui leh dawn a, ka lamah mipui an tan ngei ka beisei,” tiin fans puihna a ngen zui nghal.
Inkhel dang
Nilaini zan quarter-final inkhel dangah Belarusian second seed Aryna Sabalenka chuan 6-2 6-4-in American Madison Keys a hneh a, a ban veilama sakei tattoo chhukai Sabalenka hian Court One-ah Keys a rum khum!
Kum 25 mi Sabalenka hian nizanah a vawihnihna atan All England Club-ah semi-final a khel a; a inlan hnuhnung ber kum 2021 khan last four hi thleng tawh bawkin, nikum khan Belarus player a nih avangin Wimbledon-a a tel ve khapsak a ni a, kuminah khawng takin a kirleh a, nizana a chak leh chak loh tarlan hman a ni lo a, Inrinni Wimbledon final hi a khel a nih hrim hrim chuan Iga Swiatek kuta world number one ranking a chhuhsak thei dawn.
A zawn zata grand slam semi-final vawili khel tling Aryna Sabalenka hian nikuma Wimbledon a khelh theihlohna khan amahah tumruhna sang zawk a pe tih sawi chungin player tha zawk ni turin a pui tih a sawi.
Belarusian hian a hma deuh khan a tah mai dawn avangin nikum London grand slam a en ngam lo tih sawiin, Nilaini zana semi-final a luh leh tak hnu khan danbeh a nih lai boruak sawichhuak lehin, “Ka khel ve thei ta lo kha a lungchhiatthlak ngawih ngawih a, mahse, chutih rual chuan intuaitharna hun remchangah ka hmang,” a ti.
Nikum grass-court grand slam khel thei lo mah se kuminah khawng zawkin Sabalenka a inlan ta chiah a; January thla khan Australian Open-ah a singles major title hmasa ber a hlawhchhuak thawt a, US Open, French Open leh Wimbledon-ah semi-final a lut zui leh ta a ni.