World No. 1 thar Jannik Sinner chuan a vawikhatna atan grand slam tournament-ah top seed dinhmun a luah a, Wimbledon 2024 men’s singles seeds tarchhuahah a sangber changin, Djokovic leh Alcaraz-te’n an dawt.
Italian Sinner hian Pathianni khan world number one a nih hnua a title hmasaber hlawhchhuakin Halle Open trophy a chawi a, final-a a khingpui Hubert Hurkacz laka 7-6 (10-8) 7-6 (7-2) nehna changin a career-a a grass-court title hmasaber a hmin.
Poland star Hurkacz nen hian Germany ram tournament doubles-ah an tangdun bawk.
June thlatir world ranking-a Djokovic nekchhuaka number one dinhmun rawn luah chho Sinner hi tun season kal laiah vawithum chiah a la tlawm a, tum hnih chu French Open leh Indian Wells lama Alcaraz a hneh loh kha niin, a tlawm dang leh chu Monte Carlo-a Stefanos Tsitsipas a ngam loh kha a ni.
July ni 1 atanga khelh tan tur Wimbledon-ah hian top seed ni chungin a inlan dawn a, player hlauhawm ber tura ngaih Djokovic hi a tel thei dawn em tih a la chiang chiah lo a, Serb a inlan thei lo a nih phei chuan nikuma semi-final a thlen atang khan hma a sawn ngei rinna a lian.
Kum 22 mi hian chumi chungchang chu sawichhuakin, “Wimbledon ka thlir a, nikum khan semi-final ka thleng a, ka chetthat kal tluan lai a ni a, kumin hian engnge lo thleng dawn kan thlir ang.
“Tunhma aiin ka inringtawk tawh zawk a, chutih rualin grass leh Wimbledon zet hi chu a dan a dang deuh a, mahse, inbuatsaihna atan chawlhkar khat hun ka la nei a, ka tan tournament tha tak a nih ka beisei phawt a ni,” a ti.
Wimbledon 2024 men’s singles seeds tarchhuah a nih hnuah pawh grass-court grand slam-a tum sarih tehreng champion tling tawh Novak Djokovic-a tel theih dawn leh dawn loh a la chiang thei lo cheu a, Thawhtanni khan a hawilam sawichhuakin, “Title beisei thei khawp law law dinhmun teh thuaka a din loh chuan a chhuah kher loh tur thu a sawi!
He thu a sawi rual hian a khup hliam an zaina chuan dam lam a pan zel tih a tarlang tel. French Open-ah khan a khup dinglam a tina a, Wimbledon tan hma chawlhkar thum pawh tling tawh loah zai a han tawk leh rih a, kumin Championships-ah a hmel kan hmu lo a nih chuan title beisei ve tur dang Sinner leh Alcaraz tihte tan chuan nuih ruk ver verna tham a tling khawp ang!
Thawhtanni khan Wimbledon-ah darkar hnih chhung training a kalpui a; a khup an zaina erawh bandage hmanga tuam a la ni a; training a zawh hnua media mite’n an kawmnaah All England Club-a a kirleh thei hrim hrim pawh chu ropui tawk tawh a tih thu a sawi.
Kum 37 mi chuan BBC Sport hnenah, “He hmun hi round tlem-a-zawng chauh khel tura lo pan ka ni lo. Ka theihna sangber emaw chumi teuh tak dinhmuna ka ding a nih loh chuan chhuah hmingchhiat loh law law ka thlang zawk a, midang tana ken fel mai ka duh ang,” a ti.
Sawizawmin, “Ka thlengsang tawk dawn tih inhre chung emaw title beisei pha khawpin ka tal thei dawn tih ka chiang emaw a nih chauhin tournament-ah ka inlan ang,” tiin a dinna a sawhnghet.
Aorangi practice court-a Djokovic-a training session hi camera-in a tin thup a, Argentina player Federico Coria chuan a tihpui a, tie-break vawihnihah a hmasa zawk chu Djokovic hian a la nghe nghe.
Ngaiawh tura a beih mekna chungchang sawiin, “Nitin hian ka ‘rehab’ kalpui mek chuan kawngdik a hawi zel a, that lam ka pan zel a, chu chuan hmalam pan leh thei turin beiseina min siamsak a, min tiphur hle a ni.
“Inelnaa tel tura kir thuai thuai lam ka ngaihtuah lo a, keimah pawh 100% ni thuai thuai turin ka innawr lo a, mahse, ni rei lote hnuah hi chuan ngai ka awh leh theih tawh mai chu ka beisei,” a ti.
Kumin Wimbledon-ah a inlan thei a nih chuan Djokovic tan grass-court Grand Slam-a tum 19 a chhuahna tur a ni ang.
Tunhnai kumnga liamta chhung khan Wimbledon final lut fai vekin, 2023 final-ah set nga khelin Carlos Alcaraz a hneh lo a, kha kha Centre Court final match hnuhnung pangaa a tlawm awmchhun a ni.
Paris Games-ah hian Serbia tan a inlan leh dawn a, Olympic gold medal hi a trophy khawlbawma a khung leh thei a nih chuan mipa tennis chanchina a chimchin hi midang tana luahlan a har zual hle tawh tura ngaih a ni.
Paris hi Olympic tennis-a a vawinga inlanna tur ni mah se Olympic-ah a la champion ngai lo a, a tel vawikhatna kum 2008 Beijing-a a bronze medal hawn bak kha Olympic medal awrh a la nei lo!
Wimbledon 2024 men’s singles seeds
-- Advertisement --
Seed Player
1 Jannik Sinner
2 Novak Djokovic
3 Carlos Alcaraz
4 Alexander Zverev
5 Daniil Medvedev
6 Andrey Rublev
7 Hubert Hurkacz
8 Casper Ruud
9 Alex de Minaur
10 Grigor Dimitrov
11 Stefanos Tsitsipas
12 Tommy Paul
13 Taylor Fritz
14 Ben Shelton
15 Holger Rune
16 Ugo Humbert
17 Felix Auger-Aliassime
18 Sebastian Baez
19 Nicolas Jarry
20 Sebastian Korda
21 Karen Khachanov
22 Adrian Mannarino
23 Alexander Bublik
24 Alejandro Tabilo
25 Lorenzo Musetti
26 Francisco Cerundolo
27 Tallon Griekspoor
28 Jack Draper
29 Frances Tiafoe
30 Tomas Martin Etcheverry
31 Mariano Navone
32 Zhizhen Zhang