Wimbledon quarter lut hmasaber Pegula

Wimbledon quarter lut hmasaber Pegula
Pathianni Wimbledon hmeichhe singles fourth round inkhel pakhatah Jessica Pegula chuan 6-1 6-3-a Ukrainian Lesia Tsurenko hnehin, American fourth seed hi quarter-final lut hmasaber a ni.
Czech player ve ve inkhelah Marketa Vondrousova pawhin chhe taka bul a tan chungin Marie Bouzkova lakah 2-6 6-4 6-3 hnehna a sualchhuak a, last eight a lut ve bawk.
Vondrousova hian semi-final luh inchuh pakhatah Pegula a tum leh ang.
Russian tleirawl kum 16 mi lek Mirra Andreeva chuan Wimbledon chawlhkar hnihna chuangkai turin a chipui leh 22nd seed luahtu Anastasia Potapova lakah 6-2 7-5 hnehna a chang a, nimin round of 16 match-ah American 25th seed Madison Keys laka 6-3 6-7 (4-7) 2-6-in a tlawm zui ta a ni.
Pathianni round of 16 lamah letleh ila, world number one Iga Swiatek chuan Centre Court-ah 6-7 (4-7) 7-6 (7-2) 6-3-in Swiss 14th seed leh Olympic champion ni bawk Belinda Bencic a hneh hram a, Wimbledon quarter-final pakhatah Elina Svitolina a tum ang.
Ukrainian Svitolina hian fourth round lamah 2-6 6-4 7-6 (11-9)-in world number three hlui Victoria Azarenka a hneh a, inkhelh banah Belarusian 19th seed Azarenka hi Centre Court mipuiin an boo khum hluah hluah!
Ukrainian world number 76 Svitolina hian an ram run kawnga Russia nenan inthurual Belarus player laka hnehna a chang chu nikum October thlaa fa a hrin hnua a hringnuna a hlim ber tum a nih thu a sawichhuak hial a ni.
Ukrainian wildcard Svitolina pawh hian Russia leh Belarus player-te a chibai duh thin loh avangin ‘boo’ khum a lo hlawh fo tawh thin a, chuti chungin an ram runtut ram atanga chhuak player-te chibai a tum lohna hi a la kaltlangpui zel a, Pathianni All England Club-ah erawh mipuite auhnawmnah loh zawngah a tang ve ta thung a ni.
Kum 33 mi, Australian Open-a vawi-hnih champion tawh Azarenka hian Svitolina nen an inchibai loh hnua mipui lamin an tih dan chu ‘fair lo’ a tih thu a sawichhuak.
Beatriz Haddad Maia pawhin Inrinni third round match pakhatah 6-2, 6-2-in Sorana Cirstea a hneh a, nizan last 16 inkhel pakhatah Brazilian hmeichhe zinga WTA ranking-a top 10 chuangkai hmasa ber Haddad Mai hi set khatnaa 1-4-a a hnufual laiin a inhliam a, Elena Rybakina chuan hahdam zawkin quarter-final a lut.
Inrinni khan Czech ninth seed Petra Kvitova pawhin match riat a chakzawnna ni turin Serbian qualifier Natalija Stevanovic lakah 6-3, 7-5 hnehna a chang a, kum kaw kaltaa All England Club-a trophy a sualchhuah hnua a vawihnihna atan Wimbledon fourth round a lut.
First round lama world number one hlui Karolina Pliskova hnehtu Kvitova hian 3-6 6-3 64-a 2019 US Open champion Bianca Andreescu hnehtu Tunisian sixth seed Ons Jabeur chu round of 16 lamah a tum leh ang.