Wimbledon singles-ah Briton hmuh tur an awm tawh lo!

Wimbledon singles-ah Briton hmuh tur an awm tawh lo!
All England Club-a grass-court grand slam bultanna lamah khan tualchhung player-te an chetha a, singles lamah a hmei-a-pain first round an paltlang hum hum a, Wimbledon-a second round an luh tam ber tum an tawngbaw hial kha a ni a, mahse, hun a han kal leh det a, khelmual an luh apianga tantu ngah zawk ni zel British player-te’n ‘pressure’ an dawl zo lo nge ni dawn Wimbledon singles-a Briton 23 inlante kha an tla fai vek tawh!
Briton hming hraw zual pangate lo thlir zui ila.
Jack Draper
Kum 23 mi hian Wimbledon vawi li a khelh ve tawhah second round a la pel zo ngai lo a, kumin pawh hian round hmasaberah chak leh mai bawk mah se second round match-ah 2017 finalist Marin Cilic a ngam lo leh ta a ni.
Draper hian ‘grass’ leilunga hmasawn turin hun a la mamawh belh niin a lang a; British men’s number one ni chungin Wimbledon-ah inlan mah se home fans tan a hlawhna te, world number four a nihna te, a veilama a serve na zet leh he hmuna kum 2018-a junior runner-up a lo nih ve tawhnate chuan kuminah awmzia tak tak a nei leh ta chuang lo a, third round thleng zo lo zawng bawkin a thamral leh ta a ni.
Draper hian Indian Wells hard court title a lak bakah clay-a khelh Madrid Open final tihte chu a thleng ve mai a, grass chunga khelh an ram tournament lian berah erawh Queens warm-up tournament-a a dinhmun pawh a pha lo a, thlen san a la harsat tluang zel rih a ni.
Emma Raducanu
Ninawm khawpin 2021 US Open trophy a lak nawlh kha Post Sport lamah pawh hian kan tarlang zing tawh awm e! New York khaw major tournament-a a rawn lan ve nawlh hnu khan hliam tawp hlei thei loin a tibuai rengte a ni ve pah bawk a, grand slam tournament-ah a thleng sang tak tak ngai ta lo a, WTA ranking lamah pawh top 10 huanga kirleh tiam thin bawk mah se ranking-ah 40-na daih a luah a, a career-a a tawn san ber 10-na luah pha leh turin London tournament lian hi a tan pawimawh teh mah se kumin pawh world number one Aryna Sabalenka hneh loin third-round match a paltlang zo leh ta lo a ni.
Khawvel huap ranking-ah chuan sang fa lua lo mah se Wimbledon khelh a hun meuh chuan British women’s number one ranking luah chungin All England Club-ah a inlan leh thei ta tho a; bul pawh a tan tha phian a, 2023 champion Marketa Vondrousova pawh a paltlang mai a, Sabalenka lakah pawh beiseiawm takin a inlan a, world number one lakah dawl zawra zawr mai loin a beilet tang tang a, a chak lohna paw a nep hle nghe nghe.
Vondrousova kha tun season grass-court tournament khelh tawha champion tlemte zinga pakhat ni mah se Briton Raducanu ngam loin a tlawm a; Belarusian lakah pawh British number one kha a che thei phian a, Raducanu-Sabalenka inkhela chak zawk zawk kha kumin women’s tournament bika champion tura ngai pawh an awm nawk hial a ni.
Inkhelh ban Centre Court interview-ah pawh Sabalenka khan Raducanu hmasawnna a hmuh hmaih lo tih sawi chungin world top 10 huanga a kirleh thuai a rin thu a sawichhuak nghe nghe.
Katie Boulter
Karleh mai atanga Raducanu pawt thlaa British number one dinhmun luahkir leh tur Boulter hi Solana Sierra lakah khan rinkai zawk ni mah se Wimbledon chawlhkar hnihna a kai zo ta lo a nih kha.
Argentine qualifier Sierra hneh loa second round vela tla tura beisei a ni lo a, mahse, first-round draw lama ninth seed Paula Badosa a hneh tum khan thahrui a sawrchhuak tam ve bawk a, kha kha a tuar a tih theih bawk awm e.
Sonay Kartal
Kum 23 mi hi nikuma Wimbledon a khelh lai kha chuan WTA ranking lamah 298-na daih ni mah se karleha ranking thar tarchhuah leh turah hi chuan top 50 huang a luah pha tawh dawn a, kumin grass-court major tournament-a fourth round lai a thlen phak avangin a ranking a san phah awk dawn a ni.
Russian player tawnhriat ngah Anastasia Pavlyuchenkova hneh loin a tlawm a; amah chuan clay leilung chu a thatna ber mual a nih thu sawi mah se grass-ah pawh a nep lo tih kumin All England Club-a a thlen chin kha a hril ruak awm e.
He Briton nula hian hmalam pan zel turin theihna a nei tih a pholang tawh a, top 10 han kai pha tur khawpin a talent kawl hi a tipung zo dawn em tih chu tennis ngaihventute zawhna pakhat a ni.
Cameron Norrie
British number three hian Nicolas Jarry hneha Wimbledon quarter-final hial a thlen phak avangin ranking tharah world top 50 a luahkir leh dawn a ni.
British beiseina hnuhnungber hian a career-a last eight a luh vawi hnihnaah two-time defending champion Carlos Alcaraz ber kher a hmachhawn a, a dai ngai loh ram a thleng zo leh ta rih lo a nih kha.