Wimbledon title leh Alcaraz sawizawm a nih leh chhan

Wimbledon title leh Alcaraz sawizawm a nih leh chhan
Pathianni khan grass-court Grand Slam tournament khelh chhoh leh tur Wimbledon atana inbuatsaihna tournament lian London khuaa khelh Queen’s Club final-ah French Open-a a title kawl lai humhim zo chauh Carlos Alcaraz chuan 7-5, 6-7(5), 6-2-a Czech Jiri Lehecka hnehin a tum hnihna atan Queen’s Club title a hlawhchhuak a, Wimbledon title humhim thei turin rin a kai zual.
Pathianni Queen’s hnehn akha a career-a Spaniard world number two-in ATP title 21 a sualchhuahna ni der tawhin, kan hma lawka khelh chhoh leh mai tur Wimbledon-ah hian a zawna title vawithum la tling thei turin rin a kai leh ul tawh a, he London trophy lian beisei ve tute tan chuan champ lai Alcaraz hi paltlang huphurhawm ber a ni chiang khawpin a rinawm.
Lehecka a hnehna inkhel kha top seed Alcaraz-a tan match 18 chhung a chak zawnna chiah niin, a career-a a chak zawn rei ber a ni nghal.
Inrinni Queen’s semi-final match pakhat zawka Roberto Bautista Agut a hneh chiah khan Spaniard chuan amahah grass-court boruak a nung leh tan chiah (grass-court mode is activated) niin a sawi a, a daw lo niin a lang!
Pathiannia a grass-court title palina a hlawhchhuah leh hnuah he phul chung tournament bika tuna la inkhel player zinga Alcaraz aia title la hnem awmchhun chu Serbia superstar Novak Djokovic chiah a ni.
Spaniard Alcaraz-a tlawm hnuhnunber chu kumin April thla Barcelona Open final-a Holger Rune a hneh loh kha niin, kumina ATP final vawi nga a luh zawnah title pali a la tling.
Hei ringawt pawh hian Wimbledon title a kawl mek humhim leh tura rinkai a nihna a pholan tawh laiin Queen’s hnehna a chang leh hi Alcaraz tan inrintawkna belhchhahtu a ni khawp ang.
Wimbledon title a lak vawi khatna kum 2023 khan grass-court Grand Slam inbuatsaihna Queen’s title hi hlawkchhuakin, kuminah a ni leh a, Opne era hunah mipa zinga nipui hun khat chhunga Queen’s leh Wimbledon title la kawp thei pariat chiah an la awm.
Rafal Nadal thlaktu ang hiala an ngaih chhoh tak Alcaraz hi Wimbledon champion hlui Pat Cash pawhin kumin grass-court major atan a han ring leh mai mai khawp a, champion tum ngam chin tana paltlang ngei ngei ngai turah a ruat nghet hmiah tih BBC Radio 5 Live-ah a sawichhuak.
French Open title pawh kum hnih chhung la zawn thei Carlos Alcaraz hian Grand Slam tournament pathum atangin Grand Slam title panga a hlawhchhuak der tawh a, major title a la hawn loh awmchhun chu Australian Open chiah a ni.
Kum 22 mi ni mek kuta US Open trophy lut awmchhun chu kum 2022 title kha niin, a kumlehah a Wimbledon title hmasaber a hlawhchhuak zui leh ta a ni.
Kum 2024-ah Wimbledon leh French Open champion ni lehin, Open era bikah season khata Paris leh London major title lakawp thei mipa paruk zinga pakhat a ni a, mi huai kal hmasa – Rod Laver, Bjorn Borg, Rafael Nadal, Roger Federer leh Djokovic-te hnung zui zo awmchhun a la ni.
Nadal (2008 and 2010) leh Borg (1978, 1979, 1980) kha season khat chhunga vawi khat aia tam clay leh grass-court Grand Slam title la thei mipa zinga awmchhun an ni.
Tunthla Roland Garros final kha Alcaraz-a ropuina phochhuah belhtu a nih rualin set hnih-a hnufual zet chunga world number one Jannik Sinner a rawn lehthal lehna kawngah khan thahrui a seng hnem em em a, kha classic final ni zui ta khan darkar nga leh minute 29 chhung ngawt awhin, French Open final rei ber a ni zui ta nghe nghe a nih kha.
Alcaraz hian sulhnu ropui dang hnutchhiah turin All England Club hi a pan leh dawn a; Open era chinah Wimbledon title tum thum la zawn thei hi mipate zingah pathum chiah an la awm a, chu’ng mite chu Pete Sampras, Roger Federer leh Novak Djokovic-te niin, tennis legend rual hniakhnung hi Spaniard player la tuai tak hian a zui zawh ve rinna tun dinhmunah chuan a lian rih hle a ni.
Alcaraz hi grass court bikah a tang mar thei hle mai a, hei vang hian mipa player la inkhel mekte zingah he leilunga title pali la tling awmchhun pangana a ni hial a, vawiriat champ tawh Djokovic bakah title pali theuh hawn ve tawh Matteo Berrettini, Taylor Fritz leh Nicolas Mahut-te hnungzuitu a ni.
Nadal leh Feliciano Lopez tih lohah chuan Spanish mipate zinga grass-court tournament title pali sual chhuak tling awmchhun a ni nghal bawk.
Chutih laiin kum 22 leka upa la ni Alcaraz hian grass-court title palite hi a chipui pahnihte ai hian a hlawh chhuak rang hle zawk a, Nadal khan kum 29 a nihin heti zat hi a puitlin thei hram a, Lopez phei chuan kum 37 a nih thleng a nghah a ngai.
A sulhnu hrang hrang hnutchhiah tawh chin atang ringawt pawh hian kumin Wimbledon title leh Alcaraz hi sawizawm loh theih loh a ni!