Wirtz hovin Reds an tlawm

Last updated Jul 28, 2025 12 0
Nipui bazar inhawng meka sum seng hnem tak Liverpool chuan Inrinni khan Hongkong-ah AC Milan an hmachhawn a, 2-4 in an chak lo. AC Milan an hmachhawn tum hian sum tam tak senga an lak luh Florian Wirtz chuan bul a tan. Striker-ah Wirtz-an bul a tan lai hian Bayern Munich nena sawi zawm mek Luis Diaz chu squad-ah telh a ni lo thung.
Hongkong-a Kai Tak Sports Park khelmualah English champpion Liverpool leh Italian Serie A club lian AC Milan te an inhmachhawn a, inkhel hmuhnawm goal ruk ngawt luhna inkhelah AC Milan in hnehna an chang.
Italian club lian AC Milan hian EPL champion Liverpool lakah bul an tan tha viau a, inkhel tan atanga minute 10-na lekah Rafael Leão chuan hmahruaina goal a thun. Goal thun hmasa mah se Milan hian an goal an venghim rei thei bik lova, goal an chhuah ve thuai. Reds tan Dominik Szoboszlai chuan minute 26-naah goal thunin an si phurh a sut. Goal thun tumin innawr nasa viau mah se goal dang an thun belh thei mai lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal li ngawt a luh belh. Serie A club lian Milan bawkin bul an tan tha a, minute 52-naah Ruben Loftus-Cheek chuan hma an hruai nawn lehna goal a thun. Loftus-Cheek goal thun hnu lawkah Milan in goal dang an thun belh zui leh nghal zat a, Noah Okafor chuan minute 59-naah an goal thumna a thun a, an hmahruaina a tizua belh.
EPL champion Liverpool hian an si phurh sut tum viau mah se goal dang an thun belh lawk thei lo. Hun rei tak chhung goal lut a awm theih loh hnunin Liverpool tan Cody Gakpo chuan goal thunin an si phurh a sut then. An si phurh an sut then vangin lawm viau mah se Liverpool an lawm rei lova, goal an chhuah leh thuai. An goal thun lawma mipui au thawm a reh fel hmain AC Milan in na takin an nawr let nghal zat a, minute 90’+4-ah Noah Okafor chuan an goal lina a thun zui leh ta mai a, si hnih bawkin hma an hruai nawn leh. Hun tawp thlengin goal dang a luh belh thei tawh lova, AC Milan chuan Liverpool lakah 4-2 in hnehna an chang zui ta a ni.
AC Milan an hmachhawn tum hian Liverpool in sum tam tak senga an lak luh Florian Wirtz chuan bul a tan. Darwin Nunez a awm loh vangin Wirtz hi manager Arne Slot chuan striker-ah a chhawr a, goal thun em lo mah se a team thar tan hmuhnawm takin a inlan nghal. Wirtz hi tlarhmaah Mohamed Salah leh Ngumoha te nen an inkawp a, an hmuhnawm hle nghe nghe.
Liverpool tan Florian Wirtz-a’n bul a tan lai hian Colombian forward Luis Diaz chu Liverpool squad-ah a tel lo thung. Diaz hi German champion Bayern Munich in lak tumin an hel mek a,  a vawi hnihnan Reds hnenah Diaz lei dilna an thehlut thuai tura ngaih a ni. Bayern in Diaz lei an dilna hmasa chu Liverpool in an hnar. Bayern an lo hnar lai hian Diaz hian chhuah a duh a, German champion hi zawm a lo chak ve em em thung a, chhuah a duh thu a sawi ta hial a ni.
Luis Diaz-a’n chhuah a duh thu a sawi vangin Liverpool leh Bayern te hi an indawr thar leh a, inremna an neih theih thuai a beiseiawm niin tarlan a ni.