Wisconsin school-a silai hmehpuah vangin mi pathum thi

Wisconsin school-a silai hmehpuah vangin mi pathum thi
US a Wisconsin school-ah silai pawng kah a ni a, hei vang hian mi pathumin thih phahin, midang parukin hliam na tak an tuar.
He pawikhawihna thlen hun hi thawhtanni zan dar 11 vel kha niin, thi zingah hian pawikhawihtua puh kum tling lo pawh a tel niin police te chuan an sawi.
He pawikhawihna thlenna hmun hi Madison-ah niin, Madison police chief Shon Barnes chuan Madison tan chauh ni lo, ram pum tan thu lungchhiatthlak leh pawi tak a ni, a ti a. Mipuite chuan khawtlang nunah pawimawhna tha zawk an nei tih inhriat nan thawh ho that a tul thu a sawi.
Police te chuan report an dawn veleh school hi an pan nghal thu an sawi a, an thlen chuan silai mu tawng hliam tuar tam tak an hmuh thu sawiin, tumah an kah let ve hman loh thu leh ralthuam an lek loh thu an sawi.
Police hotupa Barnes chuan damdawi inah mi pasarih an phurh nghal thu sawiin, nunna chan zat hi a tirah chuan panga nia an hriat thu a sawi a, mahse a hnuah hei hi siamthain pathum an nih zawk thu a sawi. Nunna chan zingah hian silai hmetpuaktu ber nia rin pawh hi a tel niin a sawi bawk.
Hnuchhui hna an thawh nghal thu Barnes chuan a sawi a, president Joe Biden chu pawikhawihna thlen thu hi hriattir nghal a nih thu sawiin, White House chuan a tul anga hmalak nghal tur a nih thu a hrilh bawk niin a sawi.