World Blood Donor Day hmang Kan fate mualpho pui ngam ang.- B Lalchhanzova

Mizoram State Aids Control Society (MSACS) leh Association for Voluntary Blood Donation (AVBD) buatsaihin a thlawna thisen pe thinte Ni – World Blood Donor Day chu Zirtawpni khan Aizawlah hman a ni. Hmanpuitu minister B Lalchhanzova chuan ruihhloin a tihbuai fa nei nu leh pa, an fate home-a dah kher loa, mahnia mualpho pui ngam, khawiah emaw an harsatna ben per zel tum lo ramin a mamawh tih a sawi a. Thalaite chu an that lai hunah ruihhlo hnawl ngam a, dam rei tura taksa vawnthat a pawimawh tih a sawi.
A thlawna thisen pe thinte chu an thiltih a lar lo nia a lan pawhin ram pumin a hria a, Pathianin a hriatpui tih sawiin, “A thlawna thisen pek chu dawngtute tan thil lawmawm tak a ni,” a ti.
Kumin World Blood Donor Day thupuiah “Thisen pe la, beiseina siam rawh, tangrualin nunna kan chhan thei” tih hman a ni.
MSACS tarlan danin, sawrkar kum kalta chhung khan thisen unit 34752 pek niin hemia unit 32566 (93.71%) chu a thlawna pek a ni. Sawrkar kum kal mekah April leh May khan thisen unit 5713 pek tawh niin, unit 5148 (90.11) chu a thlawna pek a ni. Blood Donation Camp tum 90 buatsaih a ni tawh bawk.
AVBD hruaitute sawi danin, thisen var mamawhna a sang telh telh a. Thisen var hi ni 5 chauh a dam thei thung. Thisen kan pek dan, tum khata pe teuh tawh loin, pek zin leh pek ngun a pawimawh hle tih an sawi a. Pawl pakhatin kum khatah donation camp vawikhat aia tam buatsaih theuh tum ta se, thisen mamawhtute tan a hlawk zawk hle dawn tih an sawi a ni. Voluntary Blood Donation Camp ah chauh ni lo, mimala Blood Bank-a thisen pek uar zual turin mipui an sawm a. Birthday, anniversary, pass lawm ang chi ah thisen pek nachang hre thar turin an ngen.
Mizorama a thlawna thisen pe tam ber C Lalremruata (44), Electric Veng Aizawl a ni a, unit 96 a pe tawh. A pek hnuhnun ber chu kumin June 10 khan a ni