World Championships 2023 hnuhma

Hungary khawpui Budapest-a National Athletics Centre-ah athletics inkhawmpui lian World Champion-ships 2023 nghah mek niin, Thawhtan-ni khan inelna ngaihven hlawh berte zinga mi metre 100 intlansiak hmechhe final lamah US mihang nula Sha’Carri Richardson chuan gold a awrh a, star rual punkhawmna hmunah hremna avanga talbuai fo Richardson hian a career-a title lian hmasaber a hlawhchhuak.
Kumin hian United States chuan intlansiaka an ropuina an neikir leh mek a, Jamaican mite an hmakhalh chho tan.
Tun hi kum 23 mi Richardson tan major final a thlen vawikhatna niin, metre 100-a thui tlankawng hi second 10.65 chhungin a zawh zo hman a, chu chu championship record thar a ni nghal.
Pahnihna chu reigning 200m champion Shericka Jackson niin, Budapest 100m intlansiaka silver medal awrh turin Jamaican tlanchak hian second 10.72 a mamawh a; a chipui leh hmeichhe 100m intlansiaka vawinga ngawt chak ber tawh Shelly-Ann Fraser-Pryce chuan bronze medal awrh turin second 10.77 a hmang.
Britain innghahna lian pakhat Dina Asher-Smith a chechhia a, second 11.00 nen pariatna a luah pha hram.
Three-time individual world medal winner Asher-Smith hi kum 2019 khan 200m champion niin, tunah kum 27 mi a ni a, a vanglai a pel tan ta mai em ni tih zawhna a piang.
Thawhtanni final-a lawmman semna dawhsan chungnungber luahtu Richardson kha a trip zuk an manchhuah avangin nikum Tokyo Olympic-ah a tel thei lo a, nikum World Championship-a tel turin a tling zo lo bawk a, tun hi major final a thlen vawikhatna a ni a, gold medal a awrh zui ta a ni.
He level-ah hian tawnhriat a la neih loh avangin 100m semi-final lamah khan Jamaican Jackson leh Marie-Josee Ta Lou pha loin pathumnaah a thleng a, a saseh tak takah erawh tuma el phak rual lohin a thleng hmasa ta ber a, Jamaican tlanchakte a hmakhalh thei lai hi US leh athletics khawvela thil chhin-chhiahtlak pakhat a tling awm e.