World Cup 2026 champion tura rinkaite

Khawvela ennawm ropui ber FIFA World Cup chu 2026 ah khelh a ni leh dawn. World Cup khel tur zawnna neih mek a ni a, team engemawzat an tling tawh. WC 26 khel tur la hriat kim loh mah se champion tura rinkai an tarlang der tawh a. BBC Sport Journalist Emlyn Begley in champion tura a rin zualte kan tarlang ang.
Spain : European champion Spain hian player an nei tha viau. Forward an nei tha a, midfielder an nei tha em em bawk. Rodri, Martin Zubimendi leh Pedri te an nei a, holding / defensive midfielder phei chu nei tha ber an ni hial ang. Holding midfielder hi game khaikhawmtu pawimawh tak mai an ni a, hei hi Spain in rin an kai leh zual chhan pawh a tih theih. Rawlthar tha zet mai Lamine Yamal ngawt pawh hi Spain tan inrintawkna tling a ni.
2010 World Cup champion Spain hi Group E-ah awmin point hmuh theih zawng zawng an la hmu rih a, khelh li atangin point 12 hmu tawh mah se an la tling chiang bik lo thung.
France
France hi Didier Deschamps an kum 2012 atangin a enkawl tawh a, a team a hrechiang hle. A enkawlna hnuaia World Cup final vawi hnih an lut tawh a, 2018-ah an champion hnuin 2022 final-ah Argentina lakah an tlawm. A zawna a vawi thum nan final luh ngei tumin tan an khawh chho dawn a, champion tlak khawpin player pawh an nei tha viau. Kylian Mbappe chuan season kal mekah club leh ram tan vwi 13 khelin goal 17 zet a thun tawh a, World Cup 2022 top-scorer Mbappe ngawt pawh hi champion pui tur khawpa tha a ni.
World Cup khel tur zawnnaah France hi Group D-ah an awm a, Ukraine lakah point thuma hmahruaiin table chung berah an luah mek.
England : Manager thluak tha Thomas Tuchel enkawl England hi World Cup khel turin an tling chiang tawh a, Europe atanga tling chiang hmasa ber an ni. Football atchilh ram an ni a, player an nei tha em em bawk a, inelna lianah champion tura rinkai leh boruak nei lian ber pawl an ni ziah. Three Lions squad-ah player naupang leh senior an inchawih mawi tawk hle. Kum 32 mi Harry Kane chu season kal mekah a chetha viau a, Bayern Munich leh England tan vawi 12 khel tawhin goal 21 ngawt a thun. Player an neih that bakah manager an nei tha a, England hi champion tura rinkai ber zingah an tel.
Brazil : World Cup a champion ngun ber leh World Cup khel vek awmchhun Brazil hian manager tha leh tawnhriat ngah tak Carlo Ancelotti an nei thar a, an phur hle. Brazil hian engtik lai mahin player an nei chhe ngai lo. Khelh that pangngaia champion thei dinhmunah an ding reng. World Cup-ah 2002 kha an champion hnuhnun ber tum a ni a, a vawi ruk nan 2026-ah champion an tum hle ang.
Brazil hian World Cup khel tur zawnnaah an elpui lian Argentina chu 4-1 ngawtin an hneh lo. CONMEBOL atanga World Cup khel tur zawnnaah vawi 18 khelin tlawm zawkah vawi ruk an tang a, team 10 zingah panganna niin World Cup khel turin an tling. Qualifier-a an chetthat lohna ata insiamthatna hun tha an nei a, manager tawnhriat ngah Ancelotti hnuaiah hma an sawn ngei a beiseiawm a, World champion nih leh theihna hun tha an nei.
Argentina : Footballer ropui bera ngaih Lionel Messi khelhna a nih miau vangin Argentina hi manager Lionel Scaloni hnuaiah an tha thar hluai a, champion an thiam thar. Scaloni enkawlna hnuaiah vawi li ngawt an champion der tawh. Argentina player te hi ram tan an khelhin an zia a dang hlak a, an huaisen em em. Thih ngam lu puin an khingpuite an hmachhawn thin a, an beidawng ve mai mai ngai lo. Hetiang rilru pu an nih tlat vang hian tutan mah zuam chi an ni lo.
CONMEBOL atanga World Cup khel tur zawnnaah Argentina hi an khel tha viau a, South America khawmuala champion an ni a, point kua ngawtin an hnuai chiaha awm Ecuador nen point 9 ngawtin an inthlau. World Cup 2026-ah pawh hian Argentina hi champion tura rinkai an ni lo thei lo.
Portugal : Player ropui, thawkrim chungchuang Cristiano Ronaldo a awm miau vangin Portugal hi champion tura rinkai an ni. Ronaldo chauh loh pawh Portugal hian player an nei tha rual hle. Position tinah player tha tak tak an nei a, champion theihna remchang nei tha tak an nei. Portugal hian C Ronaldo vang ngawt pawhin champion an chak em em a, champion chaka tuihal an nih miau vangin an deh a khirh em em dawn. Ram leh club tana goal thun reng Ronaldo hian a ram Portugal hi champion pui a tum hle ang.
Germany : Football ram ropui an ni reng a, an huaisen em em reng bawk. Mimala tha hluai leh lar hluai an awm loh pawhin Germany hi chu team angin an tha viau zel. Tunhnaiah inelna lianah an thleng sang lo thin a, hei hian a nawr tang lehzual dawn. World Cup-ah vawi li champion tawh an ni a, champion belh tura rinkai pawh an ni.
Netherlands : Football ram ropui zinga chhiar hmaih theih loh chu Netherlands hi an ni a, Football ram ropui ni chungin World Cup-ah an la champion miah lo thung. World Cup final vawi thum an khel tawh a, vanduai zawkah an la tang vek. World champion la ni lo mah se an khel a hmuhnawmin total football chingchhuaktute an ni a, inkhel hmuhnawm tak an chhawpchhuak thin. An la champion ngai lohna World Cup-ah champion chakin an tuihal a, player an nei tha em em bawk a, champion tura rinkai zingah an tel.