Mizoten infiamna kan ngainat leh kan uar ber chu Football a ni a. Fotball a inelna sang ber chu World Cup a ni. Senior team inelna World Cup chu ‘khawvela ennawm ropui ber’ tih hial a ni. Senior inelna bakah hian kum bithliah hrang hrangah World Cup a awm ve leh a. Kum bithliah inelna tam tak zingah pawh World Cup chu inelna lian leh hlu, ngaihhlut ber a ni zel. Football atchilh Mizoten World Cup khel phak pakhat chiah kan la nei a, Under 17 World Cup khel tawh Lalengmawia Ralte (Apuia) a ni.
Football khawvelah Apuia tia hriat lar Lalengmawia Ralte hi October ni 7, 2000 khan a lo piang a. Vanlalnghaka leh Lalnunthari te fa pathum zinga a mi lai a ni. Tette atanga football tuipui, a u nena inkhel reng thin an ni. Football khelh a hautak vangin ani chu lehkha zir a, a u in football khel zawk tura thurawn an pek chang a awm thin. Mah se, Football a tuichilh miau a, a khel zel a, dan reng theih a ni lo.
Kum 2010 khan Mizorama sorkar in football academy a enkawl pahnih zinga pakhat zawk Regional Sport Training Centre, Saidan-ah a u nen football zir turin an lut a. Saidan-ah kum thum a awm hnuin Luangmual FC, Dinthar FC leh Chanmari FC tan Under 17 MPL a khel zui a. Kum 2017-ah India tan Under 17- World Cup khel tur zawnna trial hmachhawnin a tling. India in a thlen Under 17 World Cup-ah India tan Apuia hi a inlan a. Mizo zingah World Cup khel hmasa ber leh awmchhun a ni ta a ni.
World Cup meuh khelh chu a phurawmin a nghahhlelhawm lutuk a, team doctor te pawhin phur luat vangin an mu tha thei dawn lo tih an hre lawk a. Muthilhna damdawite hian an pe a ni. Mi pawimawh tak nia khelmual pan ringawt pawh a boruak a nuam viau tawh a. Khelmual khat tlata mipui lo thu tlimhmur mai leh lo au thum hluah hluah maite chu phurna namen lo tak a neihtir a. Under 17 World Cup an khelh lai boruak ang kha tawn leh a chak a, tawng leh theiin a inring tawh lo thung.
Under 17 World Cup an khelh zawh hnuin India rawlthar tha rualte hi Indian Arrows team-ah awmin Under 19 I League an hmachhawn zui leh a. Langsar vut lo mah se Apuia hi a thiam a rilin a game a nghet a, player pawimawh tak a ni chho zel. I League lamah 2017-2019 chhung a inlan. Under 19 I League khel tura an upat hret hnuin ISL a khel zui leh nghal a, ISL-a a team zawm hmasak ber chu hmarchhak team North East United a ni. North East United hi kum 2019 khan a zawm a, 2021 a Mumbai City FC a zawm hma thleng hmarchhak team tan a inlan a. NEU FC tan hian vawi 32 khelin goal khat a thun.
North East United a zawm tirhin langsar nghal lo mah se a chhuah dawn meuh chuan player pawimawh leh langsar tak a ni tawh. Kum 2021 kha atan kum tha niin Indian Super League (ISL) ah rawlthar tha ber (Emerging Player of the League) ah thlan a ni a. .FPAI Young Player of the Year ah thlan a ni tel bawk. Hemi kum vek hi club lian leh ropui zawk Mumbai City FC a zawm kum a ni tel bawk.
NEUFC tan khelh that vangin ISL club hrang hrangin an hnena khel turin an awt em em hlawm. NEUFC atanga champion lai Mumbai City FC a zawm dawn khan ISL club zawng zawngin an hnena khel turin an duh vek a. A khelh mekna North East United in chelh hram tuma tan an khawh laiin club dang zawngin lakchhuah tumin hma an la ve thung. NEUFC atanga lakchhuah a hautak tham em vangin club lian pahnih; ATK Mohun Bagan leh Mumbai City FC te an inel fal ta a. Manchester City leh football club hrang hrang neitu City football group in an enkawl mek a nih vangin Mumbai City FC a thlang ta a, a tisual lo.
Khawpui ropui leh changkang, Holywood City Mumbai-ah Apuia hian a hming a chher lian leh zual. Team lian leh ropui zawk Mumbai City FC muallai luahlumtu leh an game khai khawmtu pawimawh tak a ni chho a. Apuia a awm chuan Lallianzuala Chhangte pawh a lian zual bik thin. Mumbai team hi ISL League champion a nih pui a, kum 2024 khan ISL champion a nihpui leh bawk.
Club leh ram tan a khelh that thin am vangin club dangin an tan khel turin an awt thei hle. North East United a chhuahsan dawn laia lak tuma hma lo la tawhtu Mohun Bagan chuan lak tumin thapui an thawh nawn leh a. Sum hlawm lian tak sengin Kolkata club lian Mohun Bagan Super Giant hian an la chhuak ta nge nge a. Apuia chuan football atchilhna khawpui Kolkata a pan ta. A club thar Mohun Bagan a chetthatpui nghal chat a, ISL 2024-25 ah an khel tha viau a, table-a hmahruaitu an ni reng. ATK Mohun Bagan an khelh that viau maiin a chhuahsan tak Mumbai City FC erawh chuan beisei an phak ta lo thung a, an thawn a dai ta hle. Apuia a awm loh miau vangin Mumbai City FC game in ngai a awh lova, LZ Chhangte ngei pawh a hma angin a vul zo ta lo niin a hriat hial a ni.
Apuia hian kum bithliah inelna hrang hrangah India ai a awh tawh hnuin kum 2021 atang khan India senior team tan a khel tan. India tan hian inelna hrangah hrangah vawi 21 a khel tawh.
India tana khel a, player pawimawh a nih laiin zirna a ngaih pawimawh vangin India tan khel tura kohna a hnar a, chu chuan mak tih pawh a hlawh hle. Ram tan khel phak nih a ropui a, player zawng zawngin ram tan khelh phak an chak em em vek. Ram tan khelh phak chu hlawhtlinna a ni a, inchhuan larhna tling a ni. Mipui tling zawk a nih duh vangin Apuia erawh chuan India kohna hnarin MA exam a thlang zawk. He a thutlukna hian a hun laia India head coach Igor Stimac pawh a tithinrim viau a. Koh hlawh leh ngai tawh lo turin a vau hial a ni. Mah se, a thiam miau mai si a, Apuia hi koh loh phal hi hek lo, India aiawh tura koh a ni leh thuai tho thung.
Mi ropui leh hlawhtlingte chanchin tingaihawm zualtu chu an thawhrimna te, an inpekna leh an tawrhna te a ni. Apuia ngei pawh hian football-ah parchhuang a, hlawhtlinna a chan theih nachhan chu thuawihna leh thawhrimna nia a hriat thu a sawi.
Apuia te hian field an hnaih bawka zing hma takah ball a pet thin. Inkhel turin zing hma takah an chhuak a, a u nen chaw chhum turin an inhaw chhawk zak zak thin. Zing leh tlaiah an inkhel chawt a, chu chuan an lehkhazir a tibuai ngai lo. Football khel chunga lehkha zir that theih loh anga hriata awm tlat thin thiattu langsar zinga mi chui Apuia hi a ni ang. Zirna ngai pawimawh tak an nih vangin pawl 10 a zir lai, kum 2016 khan India Under 17 trial na remchang a neih chu a chhungte thu a awih vangin a hmachhawn lo. A nu thuin pawl 10 a exam-a tha takin a pass nghe nghe. Pawl 10 a pass hnu kum 2017-ah trial na hun remchang a nei zui leh a, a tling zui leh mai bawk. A nu thuawih vanga trial hmachhawn lova exam a hmachhawn zawk vangin malsawmna tam tak dawng zui ta ang hiala a inngaih thu Apuia hian uar takin a la sawi zui ta zel a ni.
‘Zirna hi mi puitlinga min siamtu a ni’ tia zirna ngai pawimawh em em Apuia hian Mice atangin pawl 11 a zir zo va, Phai lamah a awm tak vangin Open atangin pawl 12 a zo a, Govt. Hrangbana College atangin BA (Histry) a zo leh bakah M.A a zo zui leh bawk. India rama footballer hlawhtling ber ber zingah tel a, hlawh tam ber pawl nih phak ngawt pawh hi a ropuiin a zahaawm em em a. Chutiang mi ni chunga lehkhathiam sang ni a, Master Degree nei ngat phei chu an zahawmin, an ngaihsanawm leh zual lo thei lo. Chung zahawmna leh ropuina nei kawptu tlemte zinga mi Apuia hi a ni.
Apuia hian India Under 17 team-ah te, Indian Arrows leh North East United-ah pawh beisei angin khelhna hun a chang thei mai bik lo. Rim taka thawk chungin beidawng lovin a hun thlen hun a nghak a, a nghakchhuak a. ISL team captain ni thei naupang ber niin record a siam ta hial a ni. Tun dinhmun thleng tur hian a nun a ulukin a invawng tha a, a thawkrim em em thin. A mu hma a, zing a tho hma a, ei leh in a uluk em em reng bawk. Kristian ni lote kianga awm thin a ni a, Kristian nih that bikna lantir turin a nun a uluk a. Zing leh tlaiah Bible a chhiar fo thin. Fak leh chawimawi a phu angin a chi puiten fak leh chawimawi zo tawk thin lo mah ila, World Cup khel tawh Apuia hian fak leh chawimawi a phu a. Mizote thin lungah footballer ropui a ni reng tawh ang.
World Cup khel tawh Apuia Ralte
Get real time updates directly on you device, subscribe now.
Next Post