World Cup tan hmain star rual an inhliam phung mai!
World Cup tan hmain star rual an inhliam phung mai!
Kylian Mbappe leh Lamine Yamal telin tunlai hian football star hming hraw pui pui hliamin a tibuai nasa a, thla thar mai hi Fifa World Cup khelh tan hun a nih tawh avangin ram thenkhat chu an mangang ru hlein a rinawm!
US, Canada leh Mexico ram World Cup-a mite ngaihven ber ber ni leh tur top player-te inhliam pheng phungna chhanah hian season khat chhunga football-te inkhel hnem lutuk hi an puh ber a; hming langsar zingah Hugo Ekitike (Liverpool & France), Rodrygo (Real Madrid & Brazil) leh Serge Gnabry (Bayern Munich & Germany)-te phei chu Fifa tournament lianah hian an chhuak thei dawn lo tih nemngheh a ni tawh.
Anni bakah hian Rodri (Manchester City & Spain) leh
There are concerns about the fitness of other players, such as Rodri and Luca Zidane (Granada & Algeria)-te fitness pawhin ngai a la awh lo a, World Cup-a inpeihchhuah hman tumin theihtawp an chhuah mek a ni.
Liverpool leh Egypt forward Mohamed Salah pawh tunlai hian kaihza tha nain a tlakbuak mek a, Wolrd Cup-ah hian Pharoahs armband a rawn hreng thei dawn em tih sawilawk mai a la harsa rih!
Kaihza tha na avang bawka chawl mek Kylian Mbappe pawh France national team lamin uluk takin an vil mek a; tun thla hian Real Madrid tana khel tura a kir hman an beisei mek a, chawlhkar nga chauhin a daidan tawh World Cup-ah pawh inlan thei tura ngaih niin, France best player dinhmun erawh a chiang bik lo a, an captain ber a heti tlat hi national team boruak tithlabnartu a ni ngei ang!
Spain innghahna rawn ni chho ta Lamine Yamal pawh hliamin a bawhbet mek a, Brazil star Estevao ang bawkin tun season-ah a club vawn lai tan khelmual a lut hman tawh dawn lo!
Barca rawlthar duhawm Yamal hian a ke lamah hliam neiin, a tihrawl na avangin club lama a season zo tawh mah se Spain squad-a a tel rin a ni a, a vawi khatna atan World Cup a hmachhawn theih an la beisei mek chu a ni a!
France star Hugo Ekitike chu kumin April thla khan khup hliam buaipuiawm chiin a man hlauh a, achilles injury an tih atanga ngai awh leh tak tak tur chuan a lo berah pawh thla ruk chuang hun a duh thin a, a tan United States, Canada leh Mexico rama inkhelh ngaihna a awm ta lo a ni.
Brazil star lian pahnih Rodrygo leh Eder Militao-te tan pawh nipui tournament lian chu mahni in lum atanga thlir mai a ngai tawh a; Bayern Munich leh Germany forward Serge Gnabry pawh training laia a hliam chhar avangin kumin World Cup khel lo tur langzar zingah a tel.
Spain leh Manchester City midfielder Rodri hi a vanduai thei angreng a, season liamta hun rei zawk kha hliam (ACL damage) avangin bawksawpna’n a hmang a, a han dam a, engemaw lai atang khan thal bawr hliamin a tlakbuak zui leh a; mahse, tunhnai khan City manager Pep Guardiola chuan Rodri hmasawnna tarlangin, Ballon d’Or winner pawh lo dawng tawh Spaniard hian tun season tawp lamah hian khelmual a luh leh hman an beisei mek.
Heti taka footballer-te inhliam nasat chhoh tak zel avang hian player leh coach lamin a chhan leh a pumpelh dan an tuipui ta viau a; season khat chhuga player-te’n match khelh tur an ngah lutuk leh chawlhhahdamna hun an nei tlem lutuk chu an inhliam zeng zung chhanah an kawk.
World Cup khel tur ram an tihpun chiam hmain Club World Cup khel thei zat an phalrai ta huau a; tunhnai kum rei vak lo liamta atang khan Champions League pawh an tilian bawk a, a bik takin, player thate club lamah an rimtawng hle a, hei hi an inhliam tam chhanah an ngai tlat a ni.
Arsenal manager Mikel Arteta phei chuan heti taka player-te chunga demand sang chho ta hi ‘an accident hun an nghak a ni hawt alawm maw le’ ti hialin a lo sawi tawh nghe nghe!
Kumin World Cup khel thei lo tur chiang tawhte
Argentina: Joaquin Panichelli (ACL)
Brazil: Eder Militao (hamstring), Rodrygo (ACL)
France: Hugo Ekitike (Achilles)
Germany: Serge Gnabry (adductor)
Netherlands: Xavi Simons (ACL)
United States: Cameron Carter-Vickers (Achilles), Patrick Agyemang (Achilles)
An dinhmun ngaihchan mekte
Algeria: France icon Zinedine Zidane-a fapa Luca Zidane hi goalkeeper niin, a pa thisen avanga a khelh theihna Algeria tana khelh a thlang ta zawk a; thla hmasa mai khan khelmual chhunga an intauhna avangin a hmaiah hliam a tuar a, a dinhmun hi ngaihchan mek a ni.
Argentina: Khup hliam avanga season hmang zo tawh Cristian Romero hi World Cup khel lo tur zinga puan la ni chiah lo mah se a khelhna club Tottenham lamin a inkhelh theih hun tur an la sawi chiang thei lo.
Brazil: Rawlthar ngaihven hlawh zinga mi Estevao pawh hian kaihza tha na avangin tun thla chhung hian Chelsea tan khelmual a lut hman tawh dawn lo a, World Cup hmaa a dam chian hman dawn leh dawn loh hi an medical team lam pawhin an la sawi chiang thei bik lo.
Croatia: Veteran midfielder Luka Modric hian thla hmasa mai khan a biang ruh a tauh tliak a, a tirah han hlauthawng hman viau mah se World Cup atan erawh beiseiawma ngaih a ni.
Morocco: Paris Saint-Germain defender Achraf Hakimi pawh hi malpui dinglam na avangin a la bawksawp ve mek a, a hun takah a thochhuak hman dawn em tih chu mite ngaihven zinga mi a ni.
United States: Defender ke na Miles Robinson pawhin April ni 18 atang khan eng game mah a khel tawh lo.