World Environment Day puala intihsiak hi…

Mizoram Pollution Control Board (MPCB); Environmental Information, Awareness, Capacity building and livelihood Programme(EIACP Hub) leh Mizoram University Eco Club tangkawpte chuan World Environment Day June 5, 2024 puala intihsiakna a huaihawt a; nimin khan final round neih niin, result hi WE Day-ah puanzar a ni dawn a.
Inelna thupui hi ‘Restoration of Degraded Lands in Mizoram’ tih a ni a. Mizoram chhunga rambua leh ramngaw chereu tawhte siam thata siam thar leh a nih theihna tura hmalak dan tur ruahmanna siama inelna a ni. Inelnaa tel final round thleng pha chinte hian powerpoint presentation hmangin ram leilung chhe tawh siam that leh dan tur an entir a ni.
Eng eng emaw ‘Day’ apui hi a tam a, urhsun takin kan hmang thin. Day pualin inelna chi hrang hrang, hla inphuahsiak, essay inziahsiak, drawing, painting, short video etc… huaihawt a ni thin a, lawmman pawh tha tawk tak buatsaih a ni thin. Intihsiaknaa telte hian an thiamna leh theihna insawrbingin theihtawp an chhuah thin.
Intihsiaknaa thu tha tak tak leh hla tha tak tak, awmze nei leh zirtir tha tak tak nei an phochhuahte hi zau zawka mipui hriat atana chhawpchhuah awm tak hi, a hnu lamah hriatzui tur a awm mumal ta thin lo a, lawmman semah kan duhtawk deuh zel mai niin a lang.
Tuna World Environment Day puala intihsiakna thupui hi Mizoram tan a pawimawh hle mai a. Kan ram leilung a lo chhiat chhoh zelna chhan hi, awmze nei lova kan suasam vak vak vang a ni hran lo a, chhan leh vang tha tak nei a ni deuh vek. Thingtlang lo kan neih dan hi kan hre vek a, kum tin ram thar zuana ramngaw thiah ngai chi a ni. Eizawn a ngai a, eizawnna avangin kan ram kan tichhe thung tihna a ni. India rama ramngaw, ram hring nei tha ber thin kan ni a, a lehlamah chu kan ram ngaw/ram hring neihte chu kan tichereu chak a, India rama ramngaw tichereu chak ber, ram tiro chak ber kan ni leh mek bawk.
Kan dinhmun mek hi chu kan hrechiang thawkhat tih a hriatna chu, inelna thupui atan kan hmang thei hi a ni. Leilung chhe zel siam that lehna tur hian tihtur pahnih a awm a, chungte chu ‘tih loh tur’ leh ‘tih tur’ a ni. Ram leilung chhe mek siamthat kan duh tak tak chuan, tuna ramngaw thiat zawnga eizawnna kan kalpui mek (shifting cultivation) hi ‘bansan’ (tih loh) tur a ni a; a thlakna tur leilet ‘siam tur’ a ni ve thung. Technical vak a ngai lo; heng thil pahnihte hi tun atanga kan zawm that phawt chuan kum 50 lo awm leh turah hi chuan, Mizoram hi India rama boruak nuam ber a ni ang a, chumiin a ken tel chu ‘sum tha hmu’ a ni mai.