World Junior Taekwondo Championship India tana inlan Rami a chak lo

October ni 1-6, 2024 chhunga Chuncheon, South Korea-a khelh zawh tura ruahman World Junior Taekwondo Championships (G7) nimina khelh \an takah India tan Mizo tleirawl Ramdingliani a inlan a, round of 32 a paltlang zo lo hlauh.
Tarlan tak angin, Rami hian a ni hmasaberah khel nghalin, under 52 kg huangah intihsiak a hmachhawn a; first match-ah a bye a, khel hah loin round of 32 a lut chho nghal.
Round of 32-ah hian Thailand champion nen intumin, inhnehtawktakin khel mah se inkhel a rei deuh deuh a, Thai nula hian game a thunun hret hret a, a tawpah 4-6, 1-13-in Rami hi a chak zo ta lo a ni.
Rami hi Mizo naupang zinga World Junior Taekwondo Championships khel thei pathumna chiah niin, kum 1994 khan Robert Zohmangaiha (L) chuan a lo khel tawh a; kum 2006 khan V. Lalawmpuia’n Vietnam ramah India ai a lo awm tawh bawk a ni.
Chanmari West nula Ramdingliani hi Taekwondo Academy of Best Friend a\anga zirchhuak niin, tunah hian India rama taekwondo zirna \ha ber zinga mi NCOE Lucknow-ah a training mek a; national leh international level-ah Mizoram tan medal 18 lai la tawhin, Mizoram inelna sang ber Champion of Champions title pawh kum 15 mi lek niin a la thei hial a ni.
Ni ruk awh World Junior Championship-ah hian khawvel ram hrang hrang 127 a\angin player 963 an tel a, India aiawhin mipa 10 leh hmeichhia 10 an inlan mek.
A thlengtu South Korea leh Iran-te chu che\ha leh ber tura rinkai an ni.