August 2021 Tokyo Olympic feikhawha gold medal awrhtu Neeraj Chopra kha World Athletics-in men’s javelin throw ranking thar a tarchhuahah a sang ber a ni ta luah a, a career-a world number one dinhmun a chan vawikhatna a ni nghe nghe.
Olympic champion a nih hnuah pawh Indian javelin thrower hian zinkawng duhawm zawh chhunzawm zelin, nikum September thla khan Zurich khawpuia Diamond League 2022 finals-ah gold bawk awrh lehin, Indian zinga he title la thei hmasaber a ni leh bawk.
World No 1 thar Chopra hian ranking tharah point 1455 humin, amah hnaihbertu leh reigning world champion ni bawk, Anderson Peters (1433) lakah point 22-in a sang zawk.
Tokyo Olympics silver me-dallist Jakub Vadlejch of Czech Republic (1416) chu ranking-ah hian pathumna luahtu a ni.
Kum 25 mi Chopra hian nikum August ni 30-a ranking tarchhuahah khan world number two kai chhoin, khami hnu khan Grenada feikhawh thui Peters-a hnungah hian a tang zui ta tlat a, tunah a hmakhalh ta nge nge a ni.
Tun thlatir lam May 5 khan season hawnna Doha Diamond League-ah metre 88.67-a thui khawhin title a hlawhchhuak leh a, kha khan a dinhmun chawikangin, June ni 4 khian Netherlands rama FBK Games-ah inlanin, June ni 13 khian Turku, Finland-a Paavo Nurmi Games-ah a No 1 nihna hum turin a chechhuak zui leh ang.
World No 1 javelin thrower Olympic champ Neeraj Chopra
Get real time updates directly on you device, subscribe now.
Prev Post
Next Post