World No. 1 ni chunga kum khar tur Sabalenka

Riyadh khawpuia hmeichhe tennis season kharna tournament WTA Finals-ah Thawhlehni zan khan Coco Gauff chuan 6-3 6-4-a defending champion Iga Swiatek a hneh nawlh avangin world number one ni mek Aryna Sabalenka chuan hmeichhe ranking-a a sang ber luah chungin kum a khar thei dawn tih a chiang ta.
American mihang nula Gauff tan tun kha Swiatek nen tum 13 an intawn tawha a vawihnih chakna chiah niin, Orange group lama a match hmasa zawkah a chipui Jessica Pegula a lo hneh tawh a, bawk avangin kum 20 mi Gauff hian semi-final a lut chiang tawh a ni.
Pole Swiatek tan last four lut turin hmabak a ko hle tawh a, Pegula hneh pawh ni se an group inkhel dangah third seed Gauff-i’n zanina Barbora Krejcikova a hneh ngei ngei a ngai tel tawh.
French Open champion Swiatek hi September thla US Open quarter-final paltlang zo loin a tlawm a, chauh tawngkhawng avangin Asia khawmualpui lama khelh WTA Tour-ah a inlan lo leh ta zel a, world ranking-a number one a nihna pawh Sabalenka chuan a hmakhalh ta hial a; WTA Finals lama kum 23 mi Swiatek a chet fuh loh zui leh tak zel avangin Belarusian hian kuminah number one a luah hlen dawn ta a ni.
Thla hnih a chawlh hnua khelmual a luh leh vawikhatnaah Swiatek hi Riyadh khaw tournament-a bul a tanna match-ah Wimbledon champion Krejcikova hneh chungin a rawn cameback a, mahse, a lo hneh sek tawh Gauff lakah a tlawm zui leh ta tlat a, kumina number one dinhmun luahkir leh a beiseina a tawp fel ta a ni.
Thawhlehni khan eighth-seeded Krejcikova hian a match hnihnaah 6-3 6-3-a Jessica Pegula hnehin, American Pegula tan semi-final luhna kawng a ping nghal.
Vawihnih tlawm zawn tawh sixth-seeded Pegula hian zanina a round-robin match hnuhnungber turah semi-final lut tura chak mamawh Swiatek a hmachhawn leh ang.
Nizanah Purple Group lamin round-robin match an khel zo a, Sabalenka leh Rybakina inkhel bakah Jasmine Paolini leh Zheng Qinwen inkhela chak zawk tarlan hman a ni lo a, he group atanga semi-final lut tur kimchang tarlan hman a ni lo.