WTA Finals: Swiatek barakhaihtu Rybakina

WTA Finals: Swiatek barakhaihtu Rybakina
Riyadh khawpuia season-ending WTA Finals khelh mekah Thawhtannia 3-6, 6-1, 6-0-a Wimbledon champion Iga Swiatek hnehtu Elena Rybakina chu semi-final lut hmasaber niin, last four match khelh hmain a round-robin match hnuhnungberah Madison Keys a hmachhawn leh phawt ang.
World No. 2 Swiatek a talbuai tlat a, set hnuhnung pahnihah unforced error tum 36 ngawt neiin, Rybakina thung chuan unforced error vawi 17 bak a pel duh lo a; rin loh zawk ni chunga a hnehna sualchhuah hmangin Kazakh player hian an intawn hnuhnung vawi ngaah a tum khatna atan six-time Grand Slam champion Swiatek a hneh ve ta hlawl!
Karliamta Inrinnia a bultanna inkhela Amanda Anisimova pawh lo hneh tawh Rybakina hian a zawnin kum hnih chhung WTA Finals last four a lut ta a ni.
Kumin chhunga WTA singles title pahnih la tling tawh Rybakina hi Wimbledon-ah pawh lo champion ve tawh niin, world number two Swiatek nena an intum hnuhnung vawi liah a chak lo fai vek a, Thawhtannia a han chak ve ta hlawl kha amah pawhin mak a ti hle tih a hriat a, set hnihna atanga inrintawkna a neih tan thu leh game-a a rilru a sawrbing tlat thei khan a tihhlim thu sawi chungin tournament kal laia hmabak a la neihah pawh khati ang taka a khelh chhunzawm zel theih a beisei thu a tarlang tel.
Inrinnia Madison Keys hnehtu Swiatek hian Amanda Anisimova a hmachhawn ve leh ang.
Thawhtannia Serena Williams Group inkhel dangah Anisimova chuan 4-6, 6-3, 6-2-in a chipui American Keys chu 4-6, 6-3, 6-2-in Riyadh khawpuiah a hneh ve bawk.
Australian Open champion Keys hian double fault 12 ngawt neiin, a tumpui Anisimova aiin tum liin a nei tam zawk a; set khatna hloh zet chungin Anisimova chuan WTA Finals kal laiah a vawi khatna atan hnehna a chang a, semi-final lut tura beiseina la nei thiangin, Pole Swiatek hneh erawh chona lian a ni ang!
Fourth seed Anisimova hi kumin Wimbledon leh US Open-ah runner-up ve ve niin, world number 7 Keys laka hnehna a chan tak avangin an group atanga semi-final lut turin beiseina a nei leh ta a ni.
Inkhelh banah Keys chuan a chipui Anisimova a chibai lo a, a chhan pawh a dam loh vang a nih thu a hrilh tlang nghal.
Nizan result tarlan hman loh Steffi Graf Group lamah a match hmasabera Jasmine Paolini lo hneh tawh top seed Aryna Sabalenka chuan Jessica Pegula hmachhawnin, Pathianni khan a round robin match hmasaah Coco Gauff a lo hneh tawh avangin Pegula tan Belarusian Sabalenka hneh hi last four luhna kalkawng a nih tawh avangin inkhel pawimawh a ni.
Singles leh doubles-a a sang pariat theuh inelna kal mekah hian sum a tam thu tarlan a ni tawh a, prize money an dawn tur hi pound maktaduai 12m (USD 15.5m) zet a tling!