WTA Finals: Swiatek ngam loa tlawm Coco

On Nov 3, 2023 20 0

Hmeichhe tennis season kharna tournament ngaihhlut hlawh WTA Finals khelh mekah nimin khan group stage khelin four-time major champion Iga Swiatek leh US Open champion Coco Gauff intum a, thli thaw a nat riauna inkhelah Polish second seed Swiatek chuan 6-0 7-5 hneh-na changin, ti hian, player pahnih hi vawikhat ve ve an chak ta a ni.
Kumin August thla khan American mihang tleirawl kum 19 mi Gauff hian a career-a a vawikhatna atan Swiatek hi Cincinnati lamah a hneh ve nawlh a, mahse, tuntuma a chak loh leh tak nen vawi 10 an intum tawhah vawikua a tlawm tling.
3rd seed Gauff hian last four lut turin chance a la nei.
Inkhel dangah Tunisia chhuan-vawr Ons Jabeur chuan seventh seed Marketa Vondrousova lakah 6-4 6-3 hnehna changin Wimble-don final-a a hneh loh Czech lakah phuba a la a; Gauff ang bawkin vawikhat chak, vawikhat tlawm nei chungin semi-final luh beiseina a la nei thiang a, mahse, a final group match-a a tum leh tur hi Swiatek a nih tlat avangin hmabak khirh tak a ni thung ag. Kumin US Open final-ah pawh khan Tunisian leh Pole hi intumin, Swiatek a chak.
World number six Jabeur chuan Finals khelh meka a chak hmasakber tuma a hlawh thenkhat chu Israel-Gaza indona tuartu Palestinian-te tanpuina tura a thehchhuah tur thu a sawi.
Thawhlehni khan American Jessica Pegula chuan group match-ah tho top seed Aryna Sabalenka hnehin semi-final lut hmasaber a ni.
Belarusian Sabalenka hian nizan result tarlan hman lohah Kazakh-stan nula Elena Rybakina tum lehin, a chak a nih chuan last four lut pahnihna a ni ang.
2023 WTA Finals hi official-a a hming chu GNP Seguros WTA Finals Cancun tih niin, Women’s Tennis Association (WTA) buatsaih professional women’s championship tennis tournament a ni a, kumin hi singles inelna bikah a vawi 52-na leh doubles-ah a vawi 47-na a ni.
October ni 29 atang khan Mexico khawpui pakhat Cancun-a khelh tan niin, November ni 5 thleng awh tur a ni.
He tournament hi outdoor hardcourt-a khelh niin, 2023 WTA Tour-a ranking-a singles player leh doubles team sang pariatte theuh khelh mi a ni.
Kumin hian prize money-ah US dollar 9,000,000 semral tur niin, singles champion kutah US dollar 1,476,000 a lut ang a, doubles champion-te’n US dollar 306,000 an insem thung ang.