Yamal leh a chhehvel

Lionel Messi inzirchhuahna La Masia atanga ‘graduate’ a nihna leh Catalan team innghahna a nih chhoh tak piahlamah European Championship title hawn chunga record a siam chhoh mawlh mawlh avang te, nausen a nih laia lottery kaltlanga Barcelona superstar nena an thlalakdun tunhnaia a darh chiam avangte khan a ni pah bawk mai thei a, khawvel media-te chuan karliamta Inrinnia kum 17 tling thar Lamine Yamal kha ‘next Messi’ tiin an chhuah der tawh a, football khawvelah a hming hian sawi a lawh chho dawn chauh nite pawhin a lang.
Euro 2014-a Young Player of the Tournament award dawngtu Spain teenage sensation an tih mai Yamal hian Best Young Player of the Tournament lawmman a dawn kha birthday present a dawn tawh zawng zawnga ropui ber niin a sawi.
Tarlan tawh angin, Germany ram tournament lianah khan assist vawili a siamchhuah bakah semi-final match-ah khan goal ropui a khung a; final-a a thianpa Nico Williams-a’n Spain hmahruaina goal a chhuihluh kha a chhawpsak a ni bawk.
Barcelona lamah season liamta khan kum naupang takin a inlan a, media ngaihven hlawh nghal mah se tunhnai chawlhkar li liamta chhung khan Germany ram khawpui hrang hrangah a ‘class’ dik tak a phochhuak tan ta a; England hneha an champion hnu khan karliamta Zirtawpnia kum 22 tling ve chiah Nico Williams chuan post match press conference-ah Yamal a fak duhthawh hle.
“Lamine Yamal hi a ropui tih chu tun tournament-ah hian in hmuh kha. Best young player award a dawng thei a, Nitin hian hma a sawn zel a ni ber a, tawp chin pawh hi a neih ka ring lo,” a ti hial!
Spanish team-a Yamal-a unaupa ang maia mite pawhin an ngaih Nico chuan nau ang maia a en Yamal-a khelh dan kha a chhuang takzet tih a tarlang tel.
Yamal hi Barcelona biala pemlutte inbenbel tamna khua Mataro-a Rocafonda veng tuiliak niin, he hmun hi Spain rama mirethei ber berte khawsakna hmun niin, a pa Mounir Nasraoui hi Moroccan niin, a nu Sheila Ebana hi Equatorial Guinea chhuak a ni ve thung a; an chhang a khat ve niin a lang a, tun Europ laia naute a pawm thin kha a nau Keyne niin, a hun awlah a awm thin a, sikul atang tein a paw haw lawp lawp thin!
Euro laia France laka a goal khung a lawm tum khan a celebrate-naah number 304 a pholang a, kha kha a chawrchhuahna Rocafonda dak number (postal code) niin, Spain rama veng rethei ber pawl Rocafonda mi chengte chuan an chhuang ve khawp ang le…
Yamal-a pa Mounir Nasraoui kha tunah hian kum 32 mi lek la niin, Lionel Messi, Cristiano Ronaldo, Robert Lewondowski leh Antoine Griezman-te aiin a la naupang!
Nupui a nei har lutuk lo niin a lang a, a fapa Yamal chu tunah hian kum 17 a tling thar chiah a, Europe champion a nih der tawh piahlamah khawvela football club ropui berte zinga mi Barcelona innghahna lian a ni chho mek a; Spain rem mirethei vengah an cheng reng lo tawp ang le!

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More