Yamuna chim sang zelah Delhi sorkar a inring

Kum 2023 hnua a vawi khat nan Yamuna lui chuan Delhi-ah metre 206-a sang a chim leh mek a, khawpuiah hian tui lian thleng thei laka inralrinna kalpui nghal mek a ni.
Delhi-a Irrigation & Flood Control (I&FC) Department chuan Yamuna hi Thawhlehni zan thimhlimah khan metre 206.16-a sang a chim a, hlauhawm chin chhinchhiahna, metre 205.33 a pel tawh.
Haryana-a Hathnikund Barrage atanga tui chhuahin Delhi-a tui chim chin hi a tisang nasa hle a, hmun hnial deuh laiah chuan tui a len mai hlauhna a lian tawh hle.
Tui lian tuar thei an nih avangin Thawhlehni tlai khan I&FC Minister Parvesh Sahib Singh Verma chuan South West, South, South East leh Central Delhi district magistrate-te thutkhawmpuiin hmalak dan tur an sawiho va. Inring renga awmin a tul huna inthiar chhuah leh chhawmdawl hna thawk thei tura inpeiha awm vek turin an ti.
“Department zawng zawng chhun zan zawmin thawh tur a ni a. Tuikhuah atanga tui pump-na thlengin kil tin uluk taka vil tur a ni,” tiin minister chuan an thutkhawm zawhah a sawi a. “Najafgarh Basin bik phei chu ruah a sur nasat avangin thlithlai uluk lehzual tur a ni a. Tui pawh lo lian se tha takin kan inbuatsaih a ni tih kan hriat chauhvin Delhi-a chengte hi an chawl thei a ni,” a ti.
Delhi sorkar hian engineer leh officer-te chu an huam chhung theuhvah nileng zankhuaa awm turin an ti a. Chief engineer pahnih, superintendent engineer panga leh executive engineer 20-te chu assistant leh junior engineer-te nen rikrum a awma lo buaipui nghal thei turin dah an ni.
Tui a len thuta lo dalna tur cement ip ruak nuai 5.67 peih saa dah a ni a, lung cubic metre 3,455 leh thing nawi 14,370 chhawp a ni a. Lawngleng 58 leh lifejacket 675 dah a ni a, chhanchhuah hna thawhnaa hman turin generator 24 dah a ni a, khawlaia tui tling a awma paih chhuak turin pumping station 10 ruahman a ni a, pump 42 bunin mobile pump 82 inrintir a ni bawk.
I&FC Department-a thawktute chuan darkar tin Hathnikund, Wazirabad leh Okhla tuikhuah atanga tui chhuahte chu Delhi Jal Board (DJB), Central Water Commission (CWC) leh Haryana sorkar nen inhrilh tawn reng a ni tih an sawi.
DJB hian tui chhuah a nih dan vil turin thawktu an dah a, hei hi tui tling a awm lohna tura tih a ni.
Sorkar hotute chuan hmun hniam zual lai, Najafgarh Basin chu an thlithlai uluk zual a. South West district chuan vel vel tur ruatin an dinhmun darkar biin an tichhuak a, inthiar chhuah a ngaih pawha che nghal turin thawktu inrintir an ni a. Relief centre pawh ruahman sa a ni bawk.