Yemen-a Indian nurse tihhlum hun tur sawn

Yemen-a Indian nurse tihhlum hun tur sawn
Yemen thuneitute chuan mi a thah avanga thiam loh chantir, Indian nurse tihhlum hun tur chu a sawn tih Indian foreign ministry chuan a sawi.
Nimisha Priya-i hi tual chhung mi a thah avangin July 16-a tihhlum tura tih a ni tih amah chhan tuma beituten an sawi.
India chhim lama Kerala-a mi nurse hian a sumdawnpui, Talal Abdo Mahdi thata puhnaah hian a pha a, a mi thah ruang nia sawi hi chan darhin kum 2017 khan tui zemah hmun a ni.
Tihhlumna tur sawn hi a lailawka tih chauh a ni a, him theihna chu Mahdi-a chhungten an ngaihdam chauh a ni tawh.
Yemen-a Islam dana rorelna, Sharia an tih behchhan chuan a tuartu chhungte hnenah diyah (thisen tlanna sum) pek chauh a ni a, hemi tur hian a chhungte leh amah tantute chuan $ maktaduai 1 vel an tuak tawh a, Mahdi-a chhungte hnenah hian dawnsan turin an ngen tawh tih an sawi.
“Chhan tumin kan la bei zel a; mahse, an chhungten an ngaihdam dilna hi an pawm phawt a ngai,” tiin Save Nimisha Priya International Action Council-a tel, Babu John chuan kar hmasaa tihhlum hun tur puan ni khan a sawi.
Mahdi-a chhungte erawh hi chuan he thihna hi eng nen mah thleng an tum lo niin an sawi ve thung.
“Kan dinna chu a ngai reng a, Qisas (zaidawh taka tihlet)-a Pathian Dan ang kalpui a ni a, a bak a awm lo,” tiin a unaupa, Abdelfattah Mahdi chuan tihhlum hun tur sawn hmain a sawi.
Indian foreign ministry chuan Thawhlehni khan Yemen-a lung in thuneitute leh prosecutor’s office nen an inbe reng tih a puang.
Sorkar chuan Nimisha Priya chhungten mi dang nena inremna an neih theihna turin hun pek belh leh a nih theihna turin an bei zel tih a sawi.
Nimisha Priya-i hian kum 2008 khan Kerala chhuahsanin Yemen-a nurse hna thawk turin a kal a. Kum 2017-a Mahdi-a ruang hmuh chhuah a nih khan man a ni a. Kum 34 mi hi tunah hian Yemeni khawpui, Sanaa-a central jail-ah a tang mek.
Kum 2020 khan tual chhung court chuan thi turin a hrem a. A chhungten Yemen-a Supreme Court-ah an khing let a; mahse, kum 2023 khan khinna hi an hneh lo.
January thla tir khan hel pawl roreltu, Houthis-a Supreme Political Council President Mahdi al-Mashat chuan thi tura tihna hi a pawmpui a ni.
Nimisha-i nu, mi ina inhlawha awm thin chuan April, 2024 atang khan Kerala chhuahsanin Yemen-ah chhan tuma beiin a la awmchilh.
Yemen-a social worker Samuel Jerome-a chu Mahdi-a chhungte dawr turin a ruai.