YMA DAY!

JC.Zoremi Hmar Joute

Thlasik anga khêl lova lo thleng thin YMA day chu a ngâi têin a lo her chhuak leh ta a, hlim leh lawm takin kan hmang zo leh ta! YMA hi kum 1935 June ni 15 khan din a ni a, chuta tang chuan Pathian hruainain vawiin thleng hian mei mit lovin a la kal ta zel a, mihring kan tam tual tual a, khawvel a changkang tual tual a, chutih lai karah chuan YMA hi a hlu ve tual tual bawk a ni.
June ni 15 a lo her chhuah hma ata, hemi ni denchhena intihhlimna tur te, inelna thianghlim leh phûrawm tak nei tura inbuatsaihin, làm te zirin hlâ te kan zir tluk tluk thin a. Zan rei tak tak thleng Cheraw kân thâwm leh zâi thâwm te hriat tur awmin, fûr khaw thianga zân thla êng hnuaiah, lêngi hlim nui ri leh vâla Cheraw khâwng ‘heiha’ thâwmin khumlaizawlah min âwi a, an ni ang rual kan nih ve lai te, a chhia a chhiaa Ponds leh Velvet lotion rim nam huama kan khaw field diak zet kan chhuih pherh ve thin lai te ngaihtuah a, sulhnu leh hluinun chhuia lo sêih vein, awm an tinuam veng veng thin a nih kha!
Tûkthuan ei kham veleh bathlârah han dâk chhuak ila, kan hnam kawr ngei mai leh puanchei, tawlhlohpuan, a vakiria atanga khumbeu leh Mizo hnam inthuamna mawi eltiang chi hrang hrang nena kan thalai ten ni hlimawm tak an hmanna tur hmun an pan sung sung mai te chu keini, khiangawia rûn lùm nuthai chang tawh, a vuai thei thei vuai tan mek tawh pawhin hmuhnawm kan ti bâng lo va, kan thlir ngawih ngawih mai thin a ni a. Section hrang hrang inelna a awm dawn tih hre rân chungin awm hmunah beng kan lo chhi ngawi ve kur a, sâwt lo puiah kan lo tang ru ve teuh thin a ni.
YMA Day hman dan tlangpui chu, hnam làma intihsiak te, hnam lam chi hrang hrang entir nan leh zaia inelna te neih thin a ni a. Chu mai bakah zonun ze mawi uar taka inzirtirna hun atan te hman a ni. Zai thiam tak tak te zaiin hmun thenkhatah chuan lem chan te show a ni thin bawk a, kan ram leh hnam fuihna/chawi vulna lam hlate hlim taka sakho thin niin, thu sawi beng lut leh ngaihnawm tak tak ngaihthlâk thin a ni bawk.
Mit leh beng tlaina atan chauha intihlim mai mai an ni lo va, hnatlang te kovin thlanmual sàmfai emaw, khaw chhung tihfai te, tui luan kawr tihfai leh an nihna dik tak, ‘tanpui ngaite tanpuitu’ nih tlin takin tanpui ngaite an tanpui thin bawk. Thingtlang lamah pawh dam lohna leh rokhawlhna eng emaw vanga mahni Lo thlo thei lote thlawhfaisakna hun atan hman thin a ni bawk a, chenna in chhe tawh lutuk sak thatsakna hun atan te an hmang thin bawk; a ropuiin YMA nge nge kan ti lo thei lo!
Khai le, YMA chu eng nge a nih a, eng nge a tum tih te, eng hna nge an thawh thin a, eng nge an tangkaina tih lam chu sawi ngai lovin kan hre theuh a. Kan tan YMA hian eng nge min lo tihsak ve tawh tih leh, kan chhungkaw tan ngei pawh hian eng angin nge a hlut tih pawh Takam parawl buhfai ngah zîng tho fuh titi zât zet sawi tur kan hre hlawmin ka ring. Chhungkaw tina a tam zawkah chhiat that la tawk miah lo kan awm lo reng reng a, min tuamhlawmtu, min timawitu leh min hnêmtu pawh kawre thalai an ni lo, hei hi thu dik a ni! Sawi thui a ngai lo, mal tlat thei emaw inti, mamawh ve ngai lo tur ang maia tlawmngai pâwl sawisel ching, thiam taka YMA dem hlurh hlurh thinte bawk hian chhiat that an tawhin YMA chungah lawmthu an sawi tlawr thiam leh tho. A, a tawk e!
Ram leh hnam humhalh:
Kan hnung lawkah kumpuan thupui atan ‘zirna uar kum’ puan a ni a, thil pawimawh a ni. Hnam dang rah beh kan nih lohna tur, kan ram leh hnam din chhuah vena tur atana pawimawh ber te zing ami a ni. Tunah ‘ram leh hnam humhalh’ an han puang leh a, thil pawimawh em em mai a ni leh tho mai. Ram leh hnam humhalh han tih hian Mizo hmeichhiaina hnam dang pasala a neih loh emaw ringawt hi ram leh hnam humhalhna a ni lem lo. Hnam dang pasala neih ka thlâwp tihna ni lovin, ram leh hnam humhalh dan tur hi kawng tam tak a awm thei awm e.
Bazar leh hmun laili deuh, dawr lian leh kan sumdawnna hmunah han kal ila mutia chu vai hlir an ni; thalai hna hmu lo te kha khawiah nge in awm? Chawhmeh zawrha hmun han lut ila nuho hlirin chawhmeh an lo zuar a, thalai hna hmu lo te kha khawiah nge in awm? Sa sahna hmunah kal ila nuho bawkin sa an lo sât leh a, thalai hna hmu lo ho kha khawiah nge in awm? Office pawh han dâwr ila nuho bawk an tam leh.
In sakna hmun han thlir ila vaiho hlirin hna an lo thawk a, kan pawisa an rût mawlh mawlh a, mawlmang tein an inchei a, pawisa an khâwl tén tûn; kan thalai hna hmu lo te kha khawiah nge in awm? In ram ngeiah vaihovin lung muang takin in nu leh pate pawisa an rût zawih zawih a nia. Petrol man takngial pawh nute dil a, thawmhnaw brand tha ber ber nena pawisa nei si lova Bike-a in tlan fua fua lai khan vai ho chuan thing leh bàl takin pawisa an ngah hle. Thawh hreh nei lova vai ûm darh ang zawng te hian ram leh hnam i humhalh ang u khai!
A YMA riau a!
YMA han tih hian thil inhmeh riau te a awm ve a. Thil tum pathum chauh nei angin lang mah se a hnathawh chu tam tak a ni lawi. An thil tih leh an thutiam te, an thil tum nen hian a inthlunkhawmna chu Mizo zia, Zonun ze mawi chhawm nun leh kan kristianna nena inhmeh tak, hmangaih Pathian rîl rem zaih an ni vek a. Ram leh hnam hmangaihtuin a hun leh thâ, thiamna leh finna, a neih ang ang sâwr khawma Zofate thatna tura nun hlân a, a inpumpekna rah chhuah zarah, malsawmna kan dawngin kan chên mawlh mawlh mai a nih hi maw!
YMA member nih leh ruih bûk bûk te, aia upa zahna neih loh te. Hmeichhia, mipa zahna nei miah lo nih te a inhmeh lo hle a, thatchhiat leh zawmthâwt nen phei chuan a inkalh tlat a ni. YMA, rolreltu leh thuneitu zawk ni tura Pathianin min pekte zah leh, he harsatnain a ken tel mihring khawsak phunga kan mamawh hrang hrangah tlawmngaihna, sem sem dam dam leh ei leh in thu-a ‘nang zawkin le’ zia ngei mai pawh kha, a YMA leh riau tho mai a. Chutiang bawkin tha thawh a tulna leh tlawmngaia thil tih tur a awm a, ‘kei ka kal ang e’ ti thin zia, kan hnam nuna mawi em em pawh kha a YMA leh chat! Zonun ze mawi vawng nung turin YMA leh midang phût a chi loh, mahni-a bul tan chi, chhungkua atanga tan chi a ni e. YMA kan nei hi kan lawm tur a ni.
Kan hnam min siamtu kan Pathian chu fakin awm se la, Zofate min ensan ngai lo tur kan Pathian chu Zofate chawimawiin awm rawh se!