YMA Day pualin…

YLA din a nih dan te, YMA a lo nih tak dan te chu YMA Day a lo thlen apiangin thusawiah leh thuziakah te kan ngaithlain kan chhiar thin a, kan hre bel tlâng tawh viau awm e. Ram leh hnam tana YMA hlutna hi ngaihtuah chian poh leh a ropui. Hnam ziarang leh nunphung, tihdan tha, a khaikhawmna ‘tlawmngaihna’ vawng nungtu chu YMA hi a ni kan ti thei ang.
‘YMA hi lo awm lo ta se..’ tia han ngaihtuah hian, kum 89 kalta chhunga YMA thiltih zawng zawng kha han ‘delete’ chhin dawn ta ila, tuna Mizoram dinhmun ang hi kan pha lo hle dawn tih a lang chiang mai awm e.
Tunhmaa kan pi leh pute inrelbawl dan kha, khaw khat lal leh khawnbawl upate bakah Zawlbuk tlangvalte rorelna hnuaia khawsaho thin an ni. Khaw tinah Zawlbuk a awm a, chu chu tuna YMA branch ang hi a ni ve mai awm e. Zawlbuka la riak lut pha ve lo naupangte pawh khan Zawlbuk luhna turin Prelim exam an paltlang a ngai ve thin a, chu chu Zawlbuka zan lama tuah tur thingnawi fawm a ni. Hei bakah hian class hrang hrang, theory leh practical an nei ve a, rual u zawkte leh Upa leh pasalthate titi an ngaithla a, a chang chuan inbuan, inchai etc. te pawh an zir thin bawk.
Hun a lo kal zel a, Kristiannain min rawn luhchilh tak achinah, zawi zawiin hnam khawsak phung a lo danglam hret hret a, Zawlbuk era a lo tawp a; tunah YMA era a lo piang leh ta a.
A ler lam atanga han thlir leta tun kum sawm kal ta chhung lek pawha Mizoram hun tawng, buaina leh harsatna chi hranfg hrang – ruihhlo kaihhnawih a ni emaw, khuarel chhiatna a ni emaw, hripui Covid-19 a ni emaw, raltlan chung chang a ni emaw, ramri buai a ni emaw, kangmei, ruah leh thlipui vanga chhiatna a ni emaw, YMA tel lo hian sawrkar leh khawtlang sawrkar kan tih VC/LC te hian buaipui ta se, tun dinhmun hi kan thleng ang em?
YMA hlutna hi sawi sen a ni lo; a hlutzia kan hriat chian duh chuan ‘lo awm lo ta se’ tiin ngaihtuah ila, a chiang ber mai awm e. |anpui ngaite tanpuitu tih thuvawna neitu pawl thianghlim kan nei hi Mizote vanneihna a ni.
Mi tinin YMA hi i hlut thiam ang u; YMA vul zel rawh se.