YMA Day pualin luangchhuak

YMA Day pualin luangchhuak
Central YMA chuan YMA Day vawi 90-na pualin damdawi in leh home hrang hrangah thilpek a sem a. Mizorama pawna Mizo Welfare thenkhatah a hlan bawk.
Kumtina tih thin angin Central YMA chuan India ram khawpui hrang hranga Mizo Welfare 17 hnenah YMA Day chibai bukna Rs. 15000 theuh a pe a; Aizawl khawpui chhunga sawrkar leh kohhran damdawi in 6-ah Rs. 15000 theuh a hlan bawk.
Ningani khan Tawngtai Bethel Camping Centre (TBCC), OKM Home leh Thutak Nunpuitu Team (TNT) ah buhfai bag 50 theuh an hlan a. Buhfai hi hruaituten a hmunah kalin an hlan a ni.
Kumin YMA Day hi Pathianni a nih avangin Sub- Hqrs, Group leh Branch chu mahni remchan angin Inrinni emaw Thawhtanni emawa hmang mai turin Central YMA hian hriattirna a tichhuak a. Hmun hrang hranga YMA Day hmanpui turin Central YMA hruaitute leh Sub- Hqrs hruaitute an zin chhuak dawn a ni.
YMA Day vawi 90-na hlim leh tluang taka hmang turin YMA member zawng zawng duhsakna a hlan tih Central YMA chuan sawiin, YMA chu tlawmngai pawl, tanpui ngaite tanpuitu a nih angin YMA Day-ah mahni huamchhung theuhah chanhai, riangvai tanpui ngai tanpui a, midang tana ke pen chhuak turin Sub- Hqrs, Group leh Branch a ngen tih a sawi a ni.