YMA-in halpuah khap a thlawp hi…

Krismas leh Kumthar lawmnaa halpuah leh halmawi hal khap chungchangah kar kal ta Ningani zan khan Aizawl khawpui chhunga YMA branch hrang hrang hruaitute an inhmukhawm a, halpuah leh halmawi khap chungchanga sorkar hmalakna YMA-in a thlawp thu tarlan a ni a, mahni branch huam chhung theuhah branch YMA tin te’n theihtawp chhuahin hma lak an tum a ni.
Halpuah leh a kaihhnawih khap chungchang hi sawrkar chuan September ni 9 khan a lo puang tawh a. September ni 14 khan home minister chuan a chenna inah thuthar thehdarhtute kawmin, tunhma lamah halpuah hal lo tura inngenna hlawhtling zo lo thin mah se, kumin krismas leh kumthar vuakvetah chuan a hlawhtlin theihna turin kawng hrang hranga theihtawp chhuah tum a nih thu sawiin, khapna thupek zawm lote hremna khauh taka kenkawh ngei tum a ni, tiin a sawi a.
Halpuah chungchanga sawrkar thupuan atanga thla khat a ral hnuah YMA lamin sawrkar hmalakna a thlawp thu a puangzar leh a.
Heti a nih chuan, state chhunga thuneitu ber sawrkar leh, a ram pum huapa member ngah ber YMA-in thawhhona tha tak an nei thei dawn a, sawrkar lamin khauh taka dan kenkawh a tum bawk a, YMA branch tin ten theihtawp an chhuah bawk chuan, kum dang ai chuan a ziaawm hle tura ngaih a ni.
Hetia han ngaih mai chuan, YMA member ni lo hi chu, kum lama upa kum 70 chunglam chin emaw, kum la tling lo naupang chin emaw an ni dawn a, khauh taka khapna hnuaia halpuah han hal lui talh duh tur emaw hal ngam tur emaw an nih a rinawm loh a, halpuah hal a nih chuan, YMA member chin an ni dawn tihna a ni awm e.
A ruka halpuah lo lut tur hi lo dan beh hmak chu a harsa ang a, a lo lut tawk chu a awm ngei ngei dawn. A pawimawh ber chu, halpuah hal an awma dan anga action lak hmak hmak kha a ni mai. Minister an ni emaw, sawrkar hnathawk lian an ni emaw, MLA an ni emaw, mi hausa an ni emaw, “Khauh taka dan kenkawh” hian huam chin leh huam loh chin a nei leh si a nih chuan, Dan hi sawi sawi ve tur kan ni tawh lovang.