YMA-in plastic um tihtlem tum Raltlan awmna hmun siam rawt
Central YMA chuan plastic um hman titlem tura hma lak leh thildanga hman tangkai dan zawn a rel a. Mizorama raltlan awm mekte tan awmna hmun bik siama enkawlna felfai zawka siam an rawt bawk. YMA Inkhawmpui Lian neih loh kuma neih thin YMA Rorel Inkhawm chu Ningani khan Aizawlah Central YMA president Lalhmachhuana neih a ni a. YMA-in hma a lak nghal theihna chi thurel zingah – faina leh thianghlimna kawnga hma sawn theihnan bawlhhlawh paih dan inzirtir nise; plastic um-in kan ram a tihchhiat nasat avangin a hman tlem dan inzirtir leh thildanga hman tangkai dan kawng zawn nise, an ti.
Sawrkarin hma a lak zuina tur chi thlen tur zingah – Mizorama raltlante awmna hmun, enkawl dan leh kaihhruaina mumal tak sawrkarin siamin, khauh takin kengkawh se, an ti a. Mizoram Lokayukta-in thubuai chhuitu tur ‘investigation agency’ hranpa a neih theih nana hma lak; school thenkhatin pawl 4 thlenga Mizo subject an la zir mumal lo chu hma la tura sawrkar ngen, tih te a tel.
Rorel inkhawmah hian Central YMA treasurer Roneihthanga chuan kum 2024- 2025 chhunga CYMA budget atana Rs. 20,331,980 a pharh chu lungrual taka pawm a nih bakah YMA hruaitu hlun mi 77 hnenah chawimawina hlan an ni.
Kumpuan bawhzui tha, tuihna humhalh tha, luidung humhalh tha, ramngaw leh nungcha humhalh tha leh YMA chanchinbu la tha hnenah lawmman hlan a ni bawk.
Central YMA hnuaiah hian Sub. Hqrs. 8, Group 50 leh Branch 819 a awm a; YMA member 497946 awmin, mipa 292237 leh hmeichhia 205709 an ni. 2023 October 24-26 chhunga Biate-a YMA Inkhawmpui Lian neih leh kumin Rorel Inkhawm inkar hian YMA member 1690 an thi a, heng zinga 1395 hi mipa niin, hmeichhia 295 an ni.
YMA Rorel Inkhawma thu pawm:
YMA khawih:
Faina leh thianghlimna kawnga hma kan sawn theih nan bawlhhlawh paih dan inzirtir ni rawh se.
Plastic burin ram a tihchhiat nasat avangin a hman tlem dan inzirtir leh thildanga hman tangkai dan kawng zawn ni rawh se.
Kumtina furpuia thlen dawnin hemi kentel chhiatna laka invenlawkna turin ‘Fimkhurna Hapta/Thla’ ram pumah hman thin ni rawh se.
Mizoram chhunga kawngpui kan neihte hi a vil kawngah YMA-in hma la rawh se.
Ruihhlo do kawngah YMA-in tun aia chak zawkin hma la rawh se.
Mizo tawng humhalh kawnga YMA hmalak mekna hi chak zawka kalpui ni rawh se.
YMA Inkhawmpui Lian neih loh kumah Sub-Hqrs. YMA Inkhawmpui neih ni rawh se.
Company/corporate-ten Mizoramah CSR tam zawk an hman theih nan CYMA-in hma la rawh se.
Sawrkar khawih:
Mizorama raltlante awmna hmun tur, enkawl dan tur leh kaihhruaina mumal tak sawrkarin siamin, khauh takin kengkawh zui se.
Mizoram Lokayukta-in thubuai chhuitu tur investigation agency hranpa a neih theih nan hma lak ni rawh se.
Tunlaia school thenkhatin pawl 4 thlenga Mizo subject an la zir mumal lo hi sawrkarin hma la rawh se.
Mizoram Education (Establishment & Management of Private School) Rules hrang hrang (elementary – higher secondary) hi a tul anga siamtha in, ennawn ni rawh se.