YMA-in Zawlbuk thatna leh tangkaina a chhawm – Chief minister

Chief Minister Lalduhoma chuan, YMA-in Zawlbuk \hatna leh \angkaina kha a chhawm a ni, a ti. He thu hi nimina a bial Thenzawl Vengthlang Branch YMA kum 25 tlin lawmna a hmanpuinaah chief minister hian a sawi a. “Kristianna pensan lovin Zonun ze mawi vawnhim leh thangtharte hnena hlan chhawn hna te, hnam zia leh culture venhim te, thu leh hla, lam, rimawi leh hmunhma hlui vawnhim te YMA chuan a kalpui a, vawiina mite pawhin chu chu kan phak tawka kan kalpui ve zel a tul a ni,” a ti bawk.
Chief Minister hian Thenzawl Vengthlang YMA member leh khawtlang mipuite Jubilee chibai a buk a. Branch lo kaihruai tawhte fakin tuna hruaitu ni mekte pawh, kum tam tak lo la kal leh tur tana hmathlir thui tak nei chunga kaihruai turin a chah bawk a ni.
Chief minister Lalduhoma chuan, “Kan rama Missionary lo lutte khan rinna thar an rawn keng a ni satliah lova, biak in leh inkhawm te, ni tin sikulte an rawn keng lut tel a. Zirna kan ngaihlu tial tial a, Zawlbuk kha a rawn hliahkhuh tan a, kum 1925 atangin Zawlbuk kalpui thei khua an awm bar tawh lo. Zawlbuk ber a awm tak lovah chuan Missionary te khan Zawlbuk pawimawhna chhawm nung zel thei institution din tulin an hria a. Kum 1935 June thla tirah Pi Zaii inah inrawnkhawmna an nei a, June ni 15 ah Young Lushai Association an din ta a. Zawlbuka thalai riahkhawmtir lam kalsanin, mahni ina riaka mahni pawipang khawih chunga, pawl (Association) kaltlanga hmalakna a lo piang ta a ni,” tiin a sawi.
Chief minister hian Thenzawl Peace City din tuma chak taka hmalak mek a nih thu a sawi bawk a; “Hei hian nasa takin kan khaw hmelhmang a rawn thlak dawn a, mipuite inhawng taka kan inbuatsaih a ngai dawn tih i hre lawk ang u,” a ti bawk.
Vengthlang branch hi kum 2000 a din a ni a, tunah hian branch chhungah in ding 302 awmin mihring 1450 an cheng mek a ni.
Thenzawl hi lal hmingthang Bengkhuaia’n kum 1863 kuma a din a ni a, aman a thut loh lai pawhin a faten an thut zui zel a. Lal hnuhnung ber chu a tupa Lalngurchhina a ni. Lal Bengkhuai hi Thenzawl Bungmuala a chenna inah kum 1879 khan a thi a, a thlan pawh a in bul maiah hian a awm a ni.
Silver Jubilee lawmnaah hian branch OB lo ni tawh zawng zawngte chawimawina leh an branch huam chhunga mi infiamna lama mi hmingthate an chawimawi nghal a ni.