Thisenzam tihfai nana chaw tha

Kum a lo tam a, awm âwl leh ei tui nen, thisenzam te lo zim ve telh telh a, lung lam hriselna (cardiovascular health) kan ngaihthah a, eng emaw serious deuh tak a lo thlen hnuah kan harhchhuak chauh thin. Thisenzama thil bet inchhekkhawl (plaque) chu a lo ruhin a lo sakhat telh telh a, chu chuan atherosclerosis a thlen thei a, chu chuan heart attack, stroke leh BP sang risk te a tisang thei. Kan ei leh in tlema han fimkhur deuh hian thisenzam venna kawngah kori a tu thei viau a, tisenzam siamthat lehna kawngah pawh awmzia a nei thei. Tun tumah hian Times of India-in thisenzam tihfai nana chawtha ni a an sawi te kan rawn tarlang e.
1. Oats: Oats-ah hian beta-glucan a tam a, chu chu soluble fiber a ni a, cholesterol chhe chi (LDL) tihniam thei a ni. Zirchianna an neih hrang hranga an hmuhchhuah chu oat ei thin hian LDL cholesterol chu 5% atanga 7% thlengin a tihniam thei a, Beta-glucans hian thisenzama plaque insiam tur a tiziaawm thei bawk. Regular taka oats ei hi pum lam hriselna atana a that bakah blood sugar level a control thei a, chu chu lung hriselna atan a pawimawh hle.
2. Moringa/drumstick: Moringa an ti a, drumstick tiin kan hre lar zawk mai thei (thing-behlawi te pawh kan ti a ni awm e), antioxidant, vitamin leh bioactive compound a pai hnem a, chu chu thisenzam hriselna atan a tha hle. Antioxidant chak tan, quercetin a nei a, chu chuan inflammation a tiziaawm thei a, BP sang tur vengin, thisenzam tan a tha hle. Moringa/drumstick hian cholesterol tha chi (HDL) a tisang thei bawk. Moringa/drumstick hi a powder pawh a awm a, a hnah hring hi bazar-ah pawh lei tur a awm thin. Nitin ei theih chuan thisenzam a tifaiin, cholesterol level a siamtha thei.
3. Khawkherh: Khawkherh hi alpha-linolenic acid tam berna pawl niin, Omega-3 fatty acid kan hmuh theihna tha tak a ni. Nitin khawkherh tlem a zawng ei ziah hian cholesterol chhe chi (LDL) a tihniam thei a, BP sang tur vengin, inflammation a tiziaawm thei. BP sang (hypertension) nei tawhte tan pawh BP control nana tha a ni. Calorie a pai tam avangin tum khat tawng pawng ei teuh erawh tih loh tur a ni.
4. Curry leave/ Kadhipatta: Nutrient a pai tam a, lung hriselna atana chawtha tak a ni. Antioxidant leh fiber a pai tam a, cholesterol oxidation a tihniamin, thisen luang a titha thei. Kaempferol a pai a, chu chu inflammation tihniam thei niin, thisenzama plaque inchhekkhawl tur a vengin, a siamtha thei a, cholesterol chhe chi (LDL) a tihniam thei bawk. Blood sugar level a siamtha thei bawk a, chuvangin lung hriselna atana chawtha a ni.