YMA table tennis mipa champion Jeho-a

YMA table tennis mipa champion Jeho-a
Thiamna sang lantirin LBS Suzuki Inter Branch YMA table tennis singles-ah Jeho Himna-kulhpuingheta a champion a, Mission Vengthlang hnehin mipa team-ah Mission Veng an champion.
Zirtawpni zan khan Hawla Indoor Stadium, Republic Vengthlangah Mission Veng tlangval ve vein mipa singles final an khel a, Khelo India Youth Games champion Jehoa’n set ruk an inkhelh hnuah 12-10, 11-9, 7-11, 9-11, 11-8, 13-11-in Alberto LR Ruata a hneh.
Mizoram tennis-a player langsar pahnih niawm renga hmuhnawmin Mizoram num-ber one Jehoa leh number two Alberto an inkhel a; tharum ngah leh pumraw lian zawk Alberto chuan nawrin, na tak takin vaw mah se Jehoa’n dik leh thiam takin a lak letsak fo a, set hmasa pahnihah a umtu zawk ni zel chungin Croatia league thleng thlenga tawnhriat lo nei tawh Mizo tlangval hi a dingchang ve ve a ni.
Alberto chuan a hma aia dika ball a hlap bakah fimkhur zawka a khelh hnuah set thumna leh lina la zawn ve lehin inelna sang zawk an hmachhawn dun a, chet awlsam leh thiamna hrang hrang nei tam Jehoa’n a tanhmun siam tharin set ngana a la a, chak tlang thei turin set ruknaah 7-3-in hma a hruai.
Dinhmun derthawng hman atangin Alberto a kir leh teuh hle a, lehlamin theihtawpa a vuak tha taka a lak dik hnuah inringtawk takin a khel zui a, set la thei mai turin 10-9 a nih hnuah 11-10-in hma hruai nawn mah se hun pawimawhah talbuaiin vawi thum a vaw sual zawn a, inbeihna nasa leh bo-ruak sanga chiai lo Himna-kulhpuingheta’n Jeho Jire ti chungin champion trophy leh cheng singhnih a dawng.
Singles-ah a tum tihlawh-tling zo lo mah se Alberto chuan Misson Veng team tan trophy vaw chhuakin, mipa team final-ah 3-2-in Mission Vengthlang an hneh.
Jehoa tel ve lohna Mission Vengin team title an lakna kawngah Alberto chuan a thawhhlawk hle. Singles vawi hnih khelin awlsam taka veteran Mission Vengthlang player Zorema Pachuau a hneh hnuah H. Lalruatsanga nen an intawng leh a, champion tur chinfelna inkhel pawimawh a ni.
A hmain Ruatsanga’n C. Lalmuanpuia a hneh tawh a, Robert Pachuau chuan Lal-malsawma hneh bawkin Mission Vengthlangin game hnih game khatin hma an hruai a, Ruatsanga lakah Alberto tlawm se an champion dawn a ni.
Ruatsanga’n set hnih set khata hma a hruai hnuah singles final-a nasa taka thahrui hmang tawh Alberto tan set hloh a thiang tawh lo.
Nungchang ropui tak lantirin 6-6 a nih hnuah puitling takin a khel a, a ball nawr leh vuak a dik bakah tihsual a nei tlem a, set nga an inkhelh hnuah 7-11, 11-5, 6-11, 11-8, 11-6-in Alberto a chak a, Mission Veng a chhanhim.
2-2 a nih hnuah Mission Veng tan Muanpuia’n a vawi hnihna’n singles khelin Zorema lakah set hloh loin a tlang a, zanlai dar 1:30 velah hlim takin team champion an lawm.