Youth Congress din cham pualin thing tiak an phun

Indian Youth Congress din cham kum 63 pualin Congress Thalai chuan Zirtawpni khan Lengpui kawngah thing phunin an hnatlang.
Congress Thalai president Laltawnliana chuan, Indian Youth Congress (IYC) chu khawvela thalai pawl upa ber a ni, tiin, kum 1970 chho atang khan a dincham pualin Youth Congress chuan thing tiak phun bakah hmalakna hrang hrang a lo kakpui tawh thin a. Mizoramah pawh Congress Thalai-in ram tan hna a thawk tih a sawi a ni.
Tha ber leh dik bera insawia thutiam tam tak nen mipuia inzuar ZPM chu mipuiin beiseina sang tak nen enchhin mah se, an thlen chin zelah Mizoram mipui beidawnna nitin a zual a. Mipui manganna nasa zel tur ngaihtuahin Mizoram hmalam hun chu manganthlak tak a ni tih Laltawnliana hian a sawi a. MNF leh ZPM chu BJP naute, Mizoram leh India ram mipui tana him lo leh mangchhia an ni tih a sawi bawk.
IYC hi 1960 August 9 khan din a ni a. Kum 1947-a India ram inthen hnu lawkah kum 1960 tawp lam thleng khan Indian National Congress-a department pakhat a ni. Indira Gandhi Prime minister lai khan Youth Congress chu Congress party hmalam pantirtu leh social work lam tiin nasa takin an thawk thin. Tuna IYC president chu Srinivas BV a ni.